- वि.सं २o७९ पौष ६ बुधबार
सांसद माया राईले गरिन् अस्पतालबाटै मतदान
निर्धारित समयभन्दा ४५ मिनेट ढिलाे सुरु भएको कांग्रेस संसदीय दलको निर्वाचन सकिएको छ । निर्वाचनमा कांग्रेसका नवनिर्वाचिन ८९ सांसदले मतदान गरेका छन् । सिंहदरबारस्थित कांग्रेस संसदीय दलको कार्यालयपरिसरमा मतदानकाे व्यवस्था गरिएकाे थियाे ।
सांसद माया राई सुत्केरी भएर ओम अस्पतालमा भर्ना भएकाले उनको मतदानका लागि निर्वाचन समिति सदस्य अस्पतालमा पुगेर मतदानमा सहभागी गराएका थिए । निर्वाचन समिति सदस्य प्रकाश रसाइलीका अनुसार अस्पताल भर्ना भएकी मायालाई मतदानमा सहभागी गराउन निर्वाचन समितिका तर्फबाट सूर्य भट्टराई र दुवै उम्मेदवारका प्रतिनिधि अस्पतालमा पुगेर मतदानको व्यवस्था मिलाइएकाे हाे ।
मंसिर ४ गते सम्पन्न प्रतिनिधिसभा निर्वाचनमा कांग्रेसबाट प्रत्यक्षतर्फ ५७ र समानुपातिकतर्फ ३२ गरी ८९ सांसद निर्वाचित भएका थिए । यिनै नवनिर्वाचित सांसदले संसदीय दलको नेता छान्न मतदान गरेका हुन् ।
संसदीय दलको नेतामा प्रधानमन्त्री एवं पार्टी सभापति शेरबहादुर देउवा र पार्टीका महामन्त्री गगनकुमार थापाले उम्मेदवारी दिएका छन् । कांग्रेसको ‘संसदीय दलको नेता तथा कार्यसमिति निर्वाचन समिति’ले मतदान समाप्त भएपश्चात् आजै मतगणना र निर्वाचन परिणामको घोषणा हुने जनाएको छ ।
सभापति देउवाको उम्मेदवारीको प्रस्तावक वरिष्ठ नेता रामचन्द्र पौडेल र समर्थक पार्टी उपसभापति पूर्णबहादुर खड्का हुन् । यसैगरी, महामन्त्री थापाको उम्मेदवारीको प्रस्तावक नेता डा. शेखर कोइराला र समर्थकमा उपसभापति धनराज गुरुङ, महामन्त्री विश्वप्रकाश शर्मा र केन्द्रीय सदस्य प्रदीप पौडेल हुन् ।
आरजु राणा र मञ्जु खाणले नियम तोडे
सांसद आरजु राणा र मञ्जु खाणले मतदानस्थलमा मोबाइल लान नपाउने सहमतिविपरीत मोबाइल लगेर नाैजनाले मतदान गरिरहेको मतपत्रको समेत फोटो आउने गरी फोटो खिचेपछि केही समय विवाद भएको थियो ।
फोटो खिचेपछि इतर समूहका सहमहामन्त्री जीवन परियारले आपत्ति जनाएका थिए । यो विषयले केही समय विवादसमेत भएको थियो । निर्वाचन सुरु हुनुअघि मोबाइल लान नपाउने सहमति भएको थियो ।
बिहान ८ बजेदेखि १० बजेसम्म सिंहदरबारस्थित कांग्रेस संसदीय दलको कार्यालयपरिसरमा मतदानको व्यवस्था गरिएको थियो, तर मतदानका क्रममा सांसदलाई मोबाइल साथमा लैजान दिने वा नदिने भन्ने विषयमा विवाद हुँदा बिहान ८:४५ बजेबाट मतदान सुरु भएको थियो ।
