दुर्घटनामा परी १७ जनाको मृत्यु, २२ जना घाइते
काभ्रेको बेथानचोक गाउँपालिकाले आज शोक बिदा दिने निर्णय गरेको छ । मंगलबार साँझ भएको बस दुर्घटनामा परी मृत्यु भएकाहरूप्रति दुःख व्यक्त गर्दै र घाइतेहरूप्रति शीघ्र स्वास्थ्य लाभको कामना गर्दै गाउँपालिकाले शोक बिदा दिने निर्णय गरेको हो ।
गाउँपालिकाका अध्यक्ष भगवान अधिकारीले सूचना जारी गर्दै शोक बिदा दिने जनाएका छन् । सम्पूर्ण दिवंगत आत्माको चिरशान्तिको कामनासहित घाइतेहरूको शीघ्र स्वास्थ्यलाभको कामनाका लागि शोक बिदा दिएको अधिकारीले जानकारी दिए । गाउँपालिकाभित्रको सरकारी कार्यालयहरू, सरकारी गैरसरकारी संघ/संस्थाहरू र विद्यालयहरूलाई शोक व्यक्त गर्दै बिदा दिन भनिएको छ ।
हिजो मंगलबार साँझ बेथानचोक– ५ च्याल्टीमा व्रतबन्धमा सहभागी भई बनेपातर्फ आउँदै गरेको बा.३ख ४३८५ नम्बरको यात्रुाबाहक बस बेथानचोक– ४ चलाल गणेशस्थानमा दुर्घटना भएको थियो ।
दुर्घटनामा परी १७ जनाको मृत्यु भएको छ भने २२ जना घाइते भएका छन् । मृतकहरूमध्ये १३ जनाको सनाखत भइसकेको छ । चारजनाको सनाखत हुन बाँकी छ । घाइतेहरूको अस्पतालमा उपचार भइरहेको छ ।