हुम्लामा काठेपुलमै गुड्छन् गाडी 

हिल्सादेखि सिमकोटसम्म चारवटा खोलामा निर्माणाधीन पक्की पुल अलपत्र, ठेकेदारले पटक–पटक म्याद थप गराउँछन्, तर समयमै बनाउँदैनन्

हुम्लाको हिल्सा–सिमकोट सडकखण्डमा चारवटा पुल निर्माण नहुँदा काठेपुलकै सहारामा गाडी गुड्ने गरेका छन् । ठेकेदारहरूको चरम लापरबाहीले पाँच वर्षसम्म हेप्काखोला, तागुखोला, याङ्गारखोला सल्लीखोलामा पुल नबन्दा काठेपुलमाथि गाडी गुड्ने गरेका हुन् ।

पुल निर्माण नभएपछि सधै काठेपुल तरेर गाडी चल्ने गरेको नाम्खा गाउँपालिका– ५ की छोइजुम लामाले बताइन् । ‘काठेपुल कतिवेला भत्किन्छ कि भन्दै डरैडरमा गाडी चल्नुपर्छ,’ लामाले भनिन्, ‘सिमकोटदेखि यारीसम्म पर्ने चार ठाउँका खोलामा पुल बनेको छैन । कहिले बन्ला र ढुक्क हुन पाइएला ।’ 

पाँच वर्षसम्म पुल नबन्दा विकासको आशासमेत मरिसकेको नाम्खा गाउँपालिका– ५ का नाम्ग्याल दोर्जी तामाङले बताए । ‘पहिलेदेखि पुल निर्माण हुन्छ भन्ने सुनेका थियौँ, तर आजसम्म पुल निर्माण भएको छैन,’ उनले भने । 

वीरेन्द्रकुमार यादव, प्रमुख, हिल्सा–सिमकोट सडक योजना

ठेकेदार कम्पनीलाई वेलावेला ताकेता गरिरहेको छु, उनीहरूले विभिन्न बहाना देखाएर काम अलपत्र पार्दै आएका छन् । अब बोल्नेभन्दा कलम चलाएर नै कारबाहीको प्रक्रिया अगाडि बढाउनेछु ।

सदरमुकाम सिमकोटदेखि उत्तरी नाम्खा गाउँपालिकामा गाडी चलाउँदै आएका गाडीचालकको गुनासो उस्तै छ । पक्की पुल नबनेपछि काठेपुलमा जोखिम मोल्दै गाडी गुडाउनुपरेको सिमकोट गाउँपालिका– २ का जोर बोहराले बताए । ‘सडक पनि जताततै खोल्साखोल्सी छन्, वेलावेला गाडी फस्छ,’ उनले भने । 

सिमकोट गाउँपालिका– ७ र नाम्खा गाउँपालिका– १ मा पर्ने हेप्का खोलामा पक्की पुल निर्माणका लागि एमएस जेबी धुलिखेल जेबी काठमाडौंका प्रोप्राइटर तेजबहादुर महतले जिम्मा लिएका छन् । ६ साउन ०७४ मा दुई वर्षभित्र सक्ने गरी हेप्का खोला पुल निर्माणको सम्झौता गरिएको थियो । तर, पाँच वर्ष बितिसक्दासमेत निर्माण हुन सकेको छैन । हिल्सा सिमकोट सडक योजनामा विभिन्न कारण देखाउँदै चारपटकसम्म म्याद थप गरिएको छ । हिल्सा–सिमकोट सडक योजनाको प्रगति प्रतिवेदनमा ५२ प्रतिशत काम भएको उल्लेख छ । 

६ साउन ०७४ मा सम्झौता भएको तागुखोलाको पुल निर्माण पनि अधुरै छ । स्वच्छन्द काग्री जेबीका प्रोप्राइटर छिरिङउटुप लामाले नाम्खा गाउँपालिका– ४ मा पर्ने सल्लीखोलाको पुल निर्माणको जिम्मा लिएका थिए । तर, पाँच वर्ष भइसक्दा पनि पल अलपत्र छ । चारपटक म्याद थप गरिएको हिल्सा–सिमकोट सडक योजनाले जनाएको छ । हिल्सा–सिमकोट सडक योजनाको प्रगति प्रतिवेदनमा ७२ प्रतिशत काम सम्पन्न भएको उल्लेख छ । 

१० माघ ०७६ मा नाम्खा गाउँपालिका– ४ स्थित याङ्गारखोलामा पुल निर्माण गर्न धुलिखेल निशान जेबी बानेश्वर काठमाडौंका प्रोप्राइटर अकिल बुढाले ठेक्का लिएका थिए । तर, सम्झौता गरेको तीन वर्ष बितिसक्दासमेत पुल निर्माण हुन सकेको छैन । पुल निर्माणका लागि दुईपटक म्याद थप भइसकेको छ । पटकपटक विभिन्न बहाना बनाउँदै ठेकेदार कम्पनीले आयोजनाको म्याद थप गर्ने गरेका छन् । कहिले हिमपात, कहिले कोरोना महामारी, कहिले सामान ढुवानीका बहाना बनाउँदै काममा ढिलाइ गरेका छन् । 

हिल्सा–सिमकोट सडक योजनाका कार्यालय प्रमुख वीरेन्द्रकुमार यादवले हिमपात, अत्यधिक चिसो र सामान ढुवानी नहुँदा पुल निर्माणमा ढिलाइ भएको जानकारी दिए । ‘ठेकेदार कम्पनीलाई वेलावेला ताकेता गरिरहेको छु, उनीहरूले विभिन्न बहाना देखाएर काम अलपत्र पार्दै आएका छन्,’ उनले भने, ‘बोल्नेभन्दा कलम चलाएर नै कारबाहीको प्रक्रिया अगाडि बढाउनेछु ।’