- वि.सं २o७९ मङ्सिर २१ बुधबार
सुर्खेतमा श्रीमतीको टाउको काटेर प्लास्टिकको झोलामा बोकेर भाग्दै गरेका श्रीमान पक्राउ परेका छन् । सुर्खेत पञ्चपुरी नगरपालिका– ३ स्थित तोक्मा घर भएका ३८ वर्षीय अमरबहादुर आलेमगर श्रीमतीको हत्या गरेर भाग्दै गरेको अवस्थामा पक्राउ परेका हुन् ।
हत्यापछि मगर श्रीमतीको टाउको प्लास्टिककाे झोलामा पोको बनाएर भागेका थिए । ३० वर्षीया मीना आलेमगरलाई हँसिया प्रहार गरेर घाँटी काटेर हत्या गरेर भाग्दै गरेको अवस्थामा अमरलाई पक्राउ गरिएको जिल्ला प्रहरी कार्यालय सुर्खेतले जनाएको छ ।
टाउको प्लास्टिकको थैलोमा बोकेर भागेको अवस्थामा पलाइटे स्वास्थ्यचौकीनजिकबाट प्रहरीले उनलाई पक्राउ गरेको हाे । आरोपीलाई इलाका प्रहरी कार्यालय बाबियाचौरको हिरासतमा राखिएको छ । घटनाबारे अनुसन्धान भइरहेको जिल्ला प्रहरी कार्यालय सुर्खेतले जनाएको छ ।
मगर एक वर्षअघि मात्र वैदेशिक रोजगारीबाट फर्किएका हुन् । उनीहरूका एक छोरा र एक छोरी छन् ।
