टाइब्रेकरमा जापानलाई हराउँदै क्रोएसिया क्वार्टरफाइनलमा

गोलरक्षक डोमिनिक लिभाकोभिकले टाइब्रेकरमा जापानको तीन पेनाल्टी प्रहार विफल पारेपछि क्रोएसिया कतार विश्वकप फुटबल प्रतियोगिताको क्वार्टफाइनलमा पुगेको छ । प्रतियोगिताको साबिक उपविजेता क्रोएसियाले जापानलाई टाइब्रेकरमा ३–१ ले हराएको हो । अब क्रोएसियाले क्वार्टरफाइनलमा ब्राजिल र दक्षिण कोरियाको विजेतासँग खेल्नेछ । चालू विश्वकपको नकआउट चरणमा जापान र क्रोएसियाबीचको विजेता टाइब्रेकरबाट भएको पहिलोपटक हो । 

यसअघि सबै प्रिक्वार्टरफाइनल खेलको नतिजा निर्धारित ९० मिनेटमै निस्किए । जापान र क्रोएसियाले निर्धारित ९० तथा अतिरिक्त ३० मिनेटमा १–१ को बराबरी खेलेका थिए । त्यसपछि खेलको छिनोफानो टाइब्रेकरबाट भएको हो । जसमा क्रोएसिया भाग्यमानी ठहरियो । जापानले कतार विश्वकपमा उत्कृष्ट खेल प्रदर्शन गरी नकआउट चरण स्थान सुरक्षित गरेको थियो । 

जापानले आफ्नो समूहमा पूर्वविश्व च्याम्पियनद्वय स्पेन र जर्मनीमाथि सनसनीपूर्ण समान २–१ को नतिजा निकाली अन्तिम १६ को स्थान पक्का गरेको हो । विश्वकप इतिहासमा क्रोएसियाले टाइब्रेकरमा शतप्रतिशत नतिजा निकालेको छ । यसअघि सन् २०१८ को रसिया विश्वकपमा क्रोएसियाले डेनमार्क र रसियालाई टाइब्रेकरमै हराएको थियो । जापानले भने विश्वकपको नकआउट चरणमा दुवैपटक सामना गरेको टाइब्रेकर गुमाएको छ । सन् २०१० मा जापानले पाराग्वेसँगको प्रतिस्पर्धामा टाइब्रेकरमै पराजित भएको थियो । 

गोलरक्षक डोमिनिक नायक
टाइब्रेकरमा जापानका खेलाडीमा अनुभव कम देखिएको थियो । युरोपियन लिगमा आबद्ध क्रोएसियन खेलाडी आत्मविश्वासी देखिन्थे । जापानका लागि ताकुमी मिनामिनोको पहिलो प्रहार गोलरक्षक लिभाकोभिकले सहजै रोके । त्यसपछि क्रोएसियाका निकोला भ्लासिचले गोल गर्दै १–० को अग्रता दिलाए । जापानकबाट दोस्रो प्रहार गर्न आएका मितोमाको प्रहारलाई लिभाकोभिचले छेके । 

क्रोएसियाका मार्सेलो ब्रोजोभिचले गोल गरे । जापानका ताकुमा असानोले जापानका लागि एकमात्र टाइब्रेकरमा गोल गरे । क्रोएसियाका लागि मार्को लिभाजाको प्रहार पोस्टमा लागेको थियो । लिभाजको प्रहार पोलमा लाग्दा जापान खेलमा फर्कने आशावादी भयो । जापानका माया योसिदाको पेनाल्टी लिभाकोभिचले विफल पारे । क्रोएसियाबाट मारियो पासालिचले चौथो प्रहार गरे । उनले सहजै गोल गर्दै क्रोएसियालाई क्वार्टरफाइनलमा स्थान पक्का गरे ।

निर्धारित र अतिरिक्त समयमा १–१ को बराबरी
खेलको ४३औँ मिनेटमा जापानले १–० को अग्रता लियो । जापानलाई डेजन माएदाले गोल गरे । खेलको ५५अ‍ौँ मिनेटमा क्रोएसियाले खेल १–१ को बराबरी गोल फर्कायो । इभान पेरिसिचले डिबक्सभित्र उत्कृष्ट हेडिङ गोल गर्दै क्रोएसियालाई १–१ को स्थितिमा ल्याए । डेजान लोभ्रेनको लङ पासमा हेडिङ गोल गरेका हुन् ।