- वि.सं २o७९ मङ्सिर २ शुक्रबार
राष्ट्रिय व्यावसायिक पहल (एनबिआई)ले ४ मंसिरमा हुने प्रतिनिधिसभा तथा प्रदेश सभाको निर्वाचनको पर्यवेक्षण गर्ने भएको छ । पहलले निजी क्षेत्रका तर्फबाट निर्वाचनको पर्यवेक्षण गर्ने भएको हो ।
राष्ट्रिय व्यावसायिक पहलले ०७० सालको संविधानसभा निर्वाचनदेखि नै निरन्तर रूपमा प्रतिनिधिसभा सदस्य, प्रदेश सभा सदस्य तथा स्थानीय तहको निर्वाचनको पर्यवेक्षण गर्दै आएको छ । पहलले निर्वाचन आयोगबाट यही ४ मंसिरमा हुने निर्वाचनका लागि पनि निजी क्षेत्रको तर्फबाट पर्यवेक्षण गर्ने अनुमति पाएको हो । यसपटक पहलले देशका ६ वटा प्रदेशका २५ जिल्लामा एक सय २० जना पर्यवेक्षक परिचालन गरी निर्वाचन पर्यवेक्षण गर्न लागिरहेको छ ।
पहलले खटाएका पर्यवेक्षकलाई निर्वाचन आचारसंहिता, २०७९ तथा निर्वाचन पर्यवेक्षण निर्देशिका, २०७९ सम्बन्धी अभिमुखीकरण कार्यक्रम ३० कात्तिकमा सम्पन्न गरेको छ । साथै, पर्यवेक्षणका क्रममा आवागमन सहज पार्न खटाइएका पर्यवेक्षकलाई संस्थाको परिचय खुल्ने खालको ज्याकेट तथा सवारीसाधनका लागि ब्यानरसमेत उपलब्ध गराएको छ ।
