७३ वर्षीया सासूको हत्या गरेको आरोपमा ३३ वर्षीय ज्वाइँ पक्राउ

सुर्खेतमा सासूको हत्या गरेको आरोपमा ज्वाइँ पक्राउ परेका छन्। सुर्खेतको लेकबेँसी नगरपालिका– ९ चौरासेस्थित तिल्केपानीकी ७३ वर्षीया डिल्लीसरा जैसी (भण्डारी) को हत्या गरेको आरोपमा उनका ज्वाइँलाई प्रहरीले पक्राउ गरेको हो। 

डिल्लीसराको टाउकोमा गम्भीर चोट लागेको र उनलाई मृत अवस्थामा स्थानीयले फेला पारी वडाध्यक्ष सोमैलाई जानकारी दिएको जिल्ला प्रहरी कार्यालय सुर्खेतका डिएसपी एवं प्रहरी नायब उपरीक्षक सुरज कार्कीले बताए। डिल्लीसरा खेतमा रहेको कच्ची घरमा बस्दै आएको र उनको शव घरदेखि डेढ किलोमिटर टाढा भेटिएको घटनाको अनुसन्धान गर्दै जाँदा सुर्खेत लेकबेँसी नगरपालिका– ९ का ३३ वर्षीय ज्वाइँ नाता पर्ने सालिकराम बाँस्तोलाले हत्या गरेको खुलेको प्रहरीले जनाएको छ। 

वादविवाद हुँदा सालिकरामको धक्काले ढुंगामा टाउको ठोक्किएर डिल्लीसराको घटनास्थलमा मृत्यु भएको डिएसपी कार्कीले बताए। ‘फरार बाँस्तोलालाई भेरीगंगा नगरपालिका– ५ कालिदमारस्थित आफ्नी बहिनीको घरबाट पक्राउ गरिएको हो,’ उनले भने, ‘पक्राउ गरी आवश्यक अनुसन्धान कार्य जारी छ।’