गाउँपालिकाले विपन्न तथा असहाय परिवारका लागि सामूहिक विवाह गरिदिने

बाराको करैयामाई गाउँपालिकाले कार्यालयको खर्चमा पालिकाका विपन्न तथा असहाय परिवारका युवा/युवतीहरूका लागि सामूहिक विवाह गर्ने तयारी गरेको छ । गाउँपालिकाको कार्यालयले सोमबार सूचना जारी गर्दै सामूहिक विवाह कार्यक्रममा सहभागी हुन इच्छुकले आवेदन दिन आग्रह गरेको छ । 

गाउँपालिकाको १५औँ गाउँसभाबाट पारित योजनाअन्तर्गत १० लाखको बजेटमा सामूहिक विवाह कार्यक्रम गर्न लागिएको हो । वैशाख ११ गते हुने उक्त वैवाहिक कार्यक्रममा सहभागी हुन चैत १५ गतेभित्र आवेदन दिनुपर्ने निमित्त प्रमुख प्रशासकीय अधिकृत वीरेन्द्र महतोद्वारा जारी सूचनामा जनाइएको छ । 

वैवाहिक कार्यक्रमका लागि गाउँपालिकाभित्र बसोबास गर्ने २० वर्ष उमेर पूरा भएका युवतीले मात्रै आवेदन दिन पाउने अधिकृत महतोले बताए । गाउँपालिकाले वैवाहिक कार्यक्रममा सहभागी हुने बेहुला र बेहुलीको नागरिकता तथा जन्मदर्ता अनिवार्य गरेको छ । वैवाहिक कार्यक्रममा सहभागी हुन आवेदन दिएका युवतीको परिवार विपन्न रहे–नरहेको पहिचान गरिने र त्यसपछि मात्रै वैवाहिक कार्यक्रममा सहभागी गराइने महतोको भनाइ छ । 

आवेदन दिएर वैवाहिक कार्यक्रमका लागि छानिएका युवतीको भोजन र जग्गेमा हुने अन्य खर्च गाउँपालिकाको कार्यालयले व्यहोर्ने बताइएको छ ।