नर्वेको ओस्लोमा जारी अन्तर्राष्ट्रिय गणित ओलम्पियाड २०२२ मा नेपालको राम्राे प्रस्तुति, स्वीकृति आचार्यले बनाइन् नेपालको नयाँ रेकर्ड
नर्वेको ओस्लोमा जारी अन्तर्राष्ट्रिय गणित ओलम्पियाड (आईएमओ) २०२२ मा नेपालबाट स्वीकृति आचार्य र कपिल शर्मा पुरस्कृत भएका छन् । उनीहरू अनरेबल मेन्सनबाट पुरस्कृत भएका हुन् । यसअघि २०१९ मा बेलायतमा भएको प्रतिस्पर्धामा कार्तिकेश मिश्र र २०२१ मा रसियामा भएको प्रतियोगितामा युवराज सरदाले यो पुरस्कार प्राप्त गरेका थिए।
६३औँ अन्तर्राष्ट्रिय गणित ओलम्पियाड (विश्व प्रतियोगिता) २०२२ नर्वेको ओस्लोमा जारी छ । असार २२ देखि ३२ गतेसम्म जारी रहने प्रतियोगितामा एक सय चार देशको सहभागिता रहेको छ । यस प्रतियोगितामा नेपालले राम्रो नतिजा ल्याएको छ ।
नेपालबाट छानिएका ६ जना विद्यार्थीले यस प्रतियोगितामा सहभागिता जनाएका छन् । यो प्रतियोगितामा भाग लिन नेपाल गणित संघका अध्यक्ष दीपक बास्तोलाको नेतृत्वमा नेपाली टोली ओस्लो पुगेको छ । जसमा नेपाल गणित संघका महासचिव सनत आचार्य र कोषाध्यक्ष छवि ढुंगानाको पनि सहभागिता रहेको छ ।
यो प्रतियोगिता सन् १९५९ देखि प्रत्येक वर्ष हुँदै आएको छ । नेपाल गणित संघको पहलमा नेपालले सन् २०१७ देखि यस प्रतियोगितामा भाग लिँदै आएको संघका अध्यक्ष बास्तोलाले जानकारी दिए । नेपालको यो छैटाैँ सहभागिता रहेको उनले बताए । यस प्रतियोगितामा नेपाललाई सहभागी गराउन गणितविज्ञ भद्रमान तुलाधरको विषेश भूमिका रहेको बास्ताेलाले जानकारी दिए ।
छनाेटका आधार
यस प्रतियोगितामा भाग लिन २० वर्ष उमेर पूरा नभएका, कुनै पनि विश्वविद्यालयमा स्नातक तहमा भर्ना नभएका विद्यार्थी आ-आफ्नो देशबाट राष्ट्रिय रूपमा छानिन्छन् ।
यस प्रतियोगितामा भाग लिन नेपाल गणित संघको आयोजनामा देशभरबाट पाँच हजार विद्यार्थीले परीक्षा दिएका थिए । यसैमध्येबाट अन्तिम परीक्षामा छनोट भएका ६ जना विद्यार्थी यस प्रतियोगितामा सहभागी भएका हुन् । यस प्रतियोगितामा प्रत्येक वर्ष एउटा देशबाट बढीमा ६ जना प्रतियोगीले मात्र भाग लिन पाउँछन् ।
परीक्षाकाे किसिम
यो प्रतियोगिताको परीक्षा दुई दिनसम्म हुने गर्छ । प्रत्येक दिन तीन–तीनवटा गरी जम्मा ६ वटा प्रश्न सोधिन्छ । तीनवटा प्रश्न समाधानका लागि साढे चार घन्टाको समय हुन्छ । प्रत्येक प्रश्नको अंकभार सात हुन्छ ।
यस प्रतियोगितामा सहभागी भएकामध्ये करिब ५० प्रतिशतले पदक प्राप्त गर्छन् । १:२:३ को आधारमा स्वर्ण, रजत र कास्य पदक वितरण गरिन्छ । कुनै एउटा मात्र प्रश्नको पूर्णांक प्राप्त गरेमा पनि विद्यार्थीलाई पुरस्कृत गरिन्छ । नेपालबाट यस्तो सम्मान अहिलेसम्म चारजना विद्यार्थीले मात्र प्राप्त गरेका छन् ।
६४औँ अन्तर्राष्ट्रिय गणित ओलम्पियाड जापानमा हुने
६३औँ अन्तर्राष्ट्रिय गणित ओलम्पियाड २०२२ को आयोजना नर्वेको ओस्लो विश्वविद्यालयले गरेको हो । यसैगरी ६४औँ अन्तर्राष्ट्रिय गणित ओलम्पियाड २०२३ को आयोजना जापानले गर्नेछ । यसमा सहभागिता जनाउन देशभरबाट यही साउनको दोस्राे साताबाट छनाेट प्रक्रिया सुरु हुने अध्यक्ष बास्तोलाले जानकारी दिए ।
स्वीकृति आचार्यले बनाइन् नेपालको नयाँ रेकर्ड
यसअघि २०१९ मा बेलायतमा भएको प्रतिस्पर्धामा कार्तिकेश मिश्रले नाै अंक प्राप्त गरी उच्च रेकर्ड राखेका थिए । अहिले स्वीकृति आचार्यले १० अंक प्राप्त गरी नेपालको नयाँ रेकर्ड बनाएकी छिन् । यसैगरी कपिल शर्माले आठ अंक प्राप्त गरेका छन् ।
यसपटकको प्रतियोगितामा नेपालबाट भाग लिएका विद्यार्थीहरू
यसपटकको जारी प्रतियोगितामा नेपालबाट भाग लिएका विद्यार्थी दर्शन केसी, स्वीकृति आचार्य, रौनकरञ्जन मिश्र, कपिल शर्मा, विवेक यादव, प्रागेश पौडेल रहेका छन् ।
प्रतियोगितामा सहभागी हुँदाको फाइदा
देशको प्रतिनिधित्व गर्दै यस प्रतियोगितामा सहभागी हुने विद्यार्थीलाई स्नातक अध्ययन गर्नका लागि स्वदेश तथा विदेशका उत्कृष्ट विश्वविद्यालयमा अध्ययनका लागि छनोट हुन सजिलो हुन्छ । धेरैजसो विद्यार्थीलाई पूर्णछात्रवृत्तिमा विश्वकै विख्यात विश्वविद्यालयहरूमा अध्ययन गर्ने अवसरसमेत प्राप्त हुने गरेको नेपाल गणित संघका अध्यक्ष बास्तोलाले जानकारी दिए।
