बक्यौता नबुझाउने हेली कम्पनीलाई उडानमा रोक

बेरुजु फर्स्यौट नगरेपछि सगरमाथा निकुञ्जद्वारा ११ हेली कम्पनीको उडानमा रोक लगाउने तयारी

बुधबार, २३ चैत, २०७८
डिजिटल संस्करण

सगरमाथा राष्ट्रिय निकुञ्जले बेरुजु रकम फर्स्यौट नगर्ने हेलिकोप्टर कम्पनीलाई निकुञ्ज क्षेत्रमा उडान–अवतरणमा रोक लगाउने भएको छ ।  पटक–पटक ताकेता गर्दासमेत ११ वटा हेलिकोप्टर कम्पनीले अवैध उडान–अवतरणको बेरुजु रकम फर्स्यौट नगरेपछि निकुञ्जले उडान नै रोक लगाउने तयारी गरेको हो । 

निकुञ्ज क्षेत्रभित्र ल्यान्डिङ गरेबापतको दुई आर्थिक वर्षदेखिको बक्यौता बुझाउन हेलिकोप्टर कम्पनीले अटेरी गरेका छन् । कम्पनीहरूले आर्थिक वर्ष ०७६/७७ र ०७७/७८ को करिब सवा करोड शुल्क बुझाउन बाँकी छ । सगरमाथा राष्ट्रिय निकुञ्जका प्रमुख संरक्षण अधिकृत भूमिराज उपाध्यायको अध्यक्षतामा बसेको जिल्लास्तरीय वन्यजन्तु अपराध नियन्त्रण इकाइको बैठकले उडान–अवतरणमा रोक लगाउने निर्णय गरेको हो । 

बैठकले रकम दाखिलाका लागि ताकेता गर्ने र ताकेता गरेपछि पनि दायरामा नआए प्रवेशमा रोक लगाउने निर्णय गरेको सगरमाथा राष्ट्रिय निकुञ्जका प्रमुख संरक्षण अधिकृत उपाध्यायले बताए ।

  निकुञ्जका अनुसार कैलाश एयरले आव ०७५/७६ को आठ लाख ६१ हजार बुझाउन बाँकी छ । त्यस्तै, सिम्रिकको १८ लाख तीन हजार, एभरेस्ट हेलीको १३ लाख ८६ हजार, माउन्टेनले सात लाख ४१ हजार र डाइनेस्टीले सात लाख २९ हजार बुझाउन बाँकी रहेको निकुञ्जको तथ्यांक छ । अन्य सात कम्पनीहरूको भने चार लाखभन्दा मुनि बक्यौता रकम रहेको निकुञ्जले जनाएको छ । तर, हेलिकोप्टर कम्पनीहरूले राजस्व बुझाउन बाँकी नरहेको बताउँदै आएका छन् ।

सुझावित समाचार