अफ्रिदीले १० नम्बर जर्सी लगाउने

शनिबार, ९ असोज, २०७८
डिजिटल संस्करण

आजको खेल
काठमाडौं किंग्स इलाभेनविरुद्ध ललितपुर प्याट्रियटर्स
समयः १२:१५ दिउँसो, टियु मैदान 

घरेलु फ्रेन्चाइज क्रिकेट प्रतियोगिताकै सर्वाधिक धनराशि भएको एभेरस्ट प्रिमियर लिग (इपिएल) टी–२० क्रिकेट प्रतियोगिता शनिबारदेखि हुँदै छ । नेपालको एक मात्र अन्तर्राष्ट्रिय स्तरको क्रिकेट मैदान टियुमा चौथो संस्करणको इपिएल ९ देखि २३ गतेसम्म चल्नेछ ।

अफ्रिदीले पाए १० नम्बरकाे जर्सी 

काठमाडौंमा आबद्ध अफ्रिदीले १० नम्बरको जर्सी लगाउने भएका छन् । काठमाडौंले शुक्रबार सबै खेलाडीसहित जर्सी सार्वजनिक गर्दा १० नम्बरको जर्सी पाएका हुन् । २० वर्षको अन्तर्राष्ट्रिय क्रिकेट यात्रामा अफ्रिदीले १० नम्बरकै जर्सी लगाएका थिए । अफ्रिदीले नेपालको छोटो बसाइ हुने भए पनि यहाँको आतिथ्यबाट प्रभावित भएको बताएका छन् । ‘नेपाल आएको दुई दिन मात्र भयो, तर म यहाँको अतिथिलाई गर्ने स्वागतबाट दंग परेको छु,’ शुक्रबार आयोजित पत्रकार सम्मेलनमा अफ्रिदीले भने । 

अमेरिकामा जानुपर्ने भएकाले योपटकको इपिएलमा छोटो यात्रा भएको उनको भनाइ छ । ‘अमेरिका जान नपरेको भए म चौथो संस्करणको इपिएल पूरै खेल्ने थिएँ, तर अर्कोपटक म पुरै इपिएल खेल्ने गरी आउनेछु,’ उनले भने । नेपालको क्रिकेट तथा सम्बन्ध विकास गर्नकै लागि आफू इपिएलमा अनुबन्धित भएको अफ्रिदीको भनाइ छ । ‘नेपालको क्रिकेट विकास र दुई देशबीचको सम्बन्ध थप प्रगाढ बनाउन नै आएको हुँ,’ नेपाल आउनुको कारण बताउँदै उनले भने, ‘तपाईंहरू नेपाली क्रिकेटको विकासबारे जहिले सहयोग माग्नु हुन्छ म तयार छु ।’ 

यसैगरी काठमाडौंका कप्तान सन्दीप लामिछानेले अफ्रिदीजस्तो विश्व चर्चित खेलाडीको उपस्थितिले टोलीमा थप ऊर्जा मिलेको जनाए । ‘विश्व क्रिकेटमै नाम कमाएका अफ्रिदी हाम्रो टोलीमा छन्, अहिले अन्य युवा खेलाडीको मनोबल नै उच्च भएको छ,’ सन्दीप भन्छन्, ‘योपटक हामीले राम्रो तयारी गरेका छौँ ।’

See More On

सुझावित समाचार