नेपाली कांग्रेसको केन्द्रीय कार्यालय सानेपामा उपत्यकाका तीन जिल्लाका दलित संघले धर्ना दिइरहेका छन् । १४औँ महाधिवेशनमा दलित प्रतिनिधिको कोटा कटौती गरिएको भन्दै उनीहरूले धर्ना सुरु गरेका हुन् ।
दलित संघ काठमाडौंकी अध्यक्ष गंगा सुनारले उपत्यकाका तीन जिल्लासहित १८ जिल्लामा दलित महाधिवेशन प्रतिनिधि आउने अवस्था नरहेपछि ४ दिनदेखि धर्ना थालिएको जानकारी दिइन् ।
‘जनसंख्याको आधारमा भनियो तर उपत्यकाका तीन जिल्ला, मनाङ, रसुवालगायतका जिल्लामा प्रतिनिधि खाली हुने अवस्था देखिएपछि हामीले धर्ना थालेका हौँ,’ उनले नयाँ पत्रिकासँग भनिन्, ‘प्रदेशबाट पनि धेरै आउने अवस्था छैन । यसअघिको महाधिवेशनमा दलित प्रतिनिधि व्यवस्था गरिएको थियो । तर, यो महाधिवेशनमा कटौती गरियो।’
उनले माग पूरा नभएसम्म धर्ना निरन्तर रहने जानकारी बताइन् । उनले केन्द्रीय नेताहरूले धर्नामा ऐक्यबद्धता जनाएको र जनाउने क्रम निरन्तर रहेको जानकारी दिइन् ।
