सर्वोच्च अदालतले समयसीमा नै तोकेर विपक्षी दलका नेता शेरबहादुर देउवालाई प्रधानमन्त्रीमा नियुक्त गर्न परमादेश दिएलगत्तै विपक्षी गठबन्धनले मन्त्रिपरिषद् गठनबारे छलफल थालेको छ । देउवाको शपथलगत्तै सानो आकारको मन्त्रिपरिषद् बनाएर अघि बढ्ने गठबन्धनको निर्णय छ । सकेसम्म सर्वदलीय सरकारको कोसिस गर्ने विपक्षी गठबन्धनको निर्णय छ ।
कांग्रेस र माओवादी सहभागी मन्त्रिपरिषद् : बालकृष्ण खाण
सुरुमा सानो आकारको मन्त्रिमण्डल बन्छ । यसबारे मंगलबार बस्ने शीर्ष नेताहरूको बैठकले टुंगो लगाउँछ, हामी त राष्ट्रिय सरकार बनोस् भन्ने चाहन्छौँ
कोटेश्वरस्थित एमाले नेता माधव नेपालको निवासनजिकै वन पैदावरमा बसेको गठबन्धनको बैठकले मंगलबार प्रधानमन्त्रीको शपथपछि सानो आकारको मन्त्रिमण्डल गठन गर्ने निर्णय गरेको हो । तर, मन्त्रिमण्डल कस्तो र कति सदस्यीय बनाउने भन्नेबारे छलफल गर्न मंगलबार पुनः शीर्ष नेताको बैठक बस्ने कांग्रेसका प्रमुख सचेतक बालकृष्ण खाणले जानकारी दिए । ‘सुरुमा सानो आकारको मन्त्रिमण्डल बन्छ । मंगलबार बस्ने शीर्ष नेताहरूको बैठकले टुंगो लगाउँछ, हामी त राष्ट्रिय सरकार बनोस् भन्ने चाहन्छौँ,’ उनले भने ।
माओवादी नेता वर्षमान पुनले पनि मंगलबार सानो आकारको मन्त्रिमण्डल बन्ने र त्यसपछि सरकार र गठबन्धनको प्राथमिकता हेरेर थप कार्य गरिने बताए । ‘प्रधानमन्त्रीको शपथ भएपछि अहिले सानो आकारको मन्त्रिमण्डल बन्छ, त्यसपछि सर्वदलीय सरकारको पहल गर्ने भन्ने छ । त्यस्तो नभए गठबन्धन त छँदै छ,’ उनले भने ।
तर, तत्कालै नेपाल समूह भने सरकारमा सहभागी नहुने भएको छ । नेता नेपालले अहिले आफूहरूको पार्टी एकताको प्रक्रिया अघि बढेकाले तत्काल गठबन्धनबाट बाहिरिने र सरकारमा सहभागी हुने वा नहुनेबारे पछि छलफल गर्ने बताएका थिए ।
गठबन्धनको बैठकमा नयाँ सरकार कहिलेसम्म रहने भन्नेबारेमा पनि छलफल भएको छ । ‘यो सरकार पूरै अवधिसम्म जान्छ । हामी जानुपर्छ भन्नेमै छौँ । त्यसबारे निर्क्योल भएको छैन, तर थप छलफल गरेर सरकारलाई संसद्को आयु रहुन्जेल काम गर्न दिनुपर्छ भन्ने नै छ,’ जसपाका नेता राजेन्द्र श्रेष्ठले भने ।
देउवालाई बधाई, नेपालको प्रशंसा
विपक्षी गठबन्धनको सोमबारको बैठकमा नयाँ प्रधानमन्त्रीका लागि देउवाले बधाई पाए । तर, बैठकमा बोल्ने अधिकांश नेताले एमाले वरिष्ठ नेपालको प्रशंसा गरे । नेपालको साहसिक निर्णयले मात्रै मुलुकको संविधान र लोकतन्त्रको रक्षा गर्ने कार्यको जित भएको भन्दै बैठकमा अधिकांश नेताले नेपालको प्रशंसा गरेका थिए । जनता समाजवादी पार्टीका नेता श्रेष्ठले नेपाल प्रतिगमनविरुद्धको आन्दोलनको नायक भएको बताए । ‘प्रधानमन्त्रीमा हामीले देउवाजीलाई अघि सार्यौँ । तर, वास्तवमा यो कोर्सको नायकचाहिँ माधवकुमार नेपाल नै हो,’ उनले भने ।
