रामेछापको आइसोलेसनमा उपचाररत दुुई कोरोना संक्रमित गम्भीर भएपछि काठमाडौं पठाइयो

बुधबार, २२ बैशाख, २०७८
डिजिटल संस्करण

केही दिनअघि कोरोना संक्रमण देखिएपछि जिल्ला अस्पताल रामेछापको आइसोलेसनमा भर्ना भई उपचार गरिरहेका दुुईजनाको अवस्था गम्भीर भएपछि बुधबार थप उपचारका लागि काठमाडौं पठाइएको छ । दोस्रो लहरको कोरोना संक्रमण देखिएपछि एक हप्तादेखि जिल्ला अस्पतालको आइसोलेसनमा उपचाररत मन्थली नगरपालिकाका ६६ वर्षीय पुरुष र रामेछापका ४० वर्षीय पुरुषको अवस्था गम्भीर भएपछि थप उपचारका लागि काठमाडौं पठाइएको जिल्ला स्वास्थ्य कार्यालय रामेछापका प्रमुख जितेन्द्रकुमार कर्णले जानकारी दिए ।

जिल्ला अस्पताल रामेछापमा निर्माण गरिएको १८ बेड क्षमताको आइसोलेसन कक्षमा हाल सातजनाको उपचार भइरहेको थियो । उपचाररत सातजनामध्ये दुुईजनाको अवस्था जटिल बनेपछि काठमाडांै पठाइएको र हाल पाँच सक्रिय संक्रमितको आइसोलेसनमा उपचार भइरहेको जिल्ला स्वास्थ्य कार्यालय रामेछापले जनाएको छ ।

दोस्रो लहरको कोरोनाको जोखिम बढेसँगै कोरोना सक्रिय संक्रमितको संख्यामा समेत वृद्धि भएको छ । अहिले मन्थली नगरपालिकामा १८, रामेछाप नगरपालिकामा एक, खाँडादेवी गाउँपालिकामा तीन, गोकुुलगंगा गाउँपालिकामा नौ, दोरम्बा गाउँपालिकामा दुई र लिखुु तामाकोसी गाउँपालिकामा सात गरी ४७ जना सक्रिय संक्रमित रहेको जिल्ला स्वास्थ्य कार्यालय रामेछापले जानकारी दिएको छ ।

अधिकांश कोरोना संक्रमित होम आइसोलेसनमा बसेका छन् । गाउँपालिकाहरूले लाखौँ खर्च गरेर आइसोलेसन कक्ष निर्माण गरे पनि अधिकांश आइसोलेसन कक्ष खाली छन् । जिल्लाभर हाल एक सय १६ बेड क्षमताको आइसोलसन कक्ष निर्माण भएको छ ।
 

सुझावित समाचार