केपी ओली समूहमा आबद्ध नभएको भन्दै भेरी नगरपालिकाका नगरप्रमुख चन्द्रप्रकाश घर्तीको ठाडो निर्देशनमा तीनजना कर्मचारीलाई बर्खास्त गरिएको छ ।
केपी ओली समूहका केन्द्रीय सदस्य रहेका मेयर घर्तीले नगरपालिकामा कार्यरत एमआइएस अपरेटर पवन शर्मा, सरोज वली र सहायक चौथो पदमा कार्यरत भरतकुमार शर्मालाई मंगलबार बर्खास्त गरेका हुन् ।
प्रमुख प्रशासकीय अधिकृत दलबहादुर बुढाले उठाएको टिप्पणी मेयर घर्तीले सदर गरेका छन् । कर्मचारी बर्खास्त गर्दा अधिकृतले सदर गर्नुपर्ने भए पनि मेयर आफैँले सदर गरेका छन् । तीनजना कर्मचारीलाई सोधिएको पत्रमा भनिएको छ, ‘तपाईंहरू प्रचण्ड र माधव समूहको प्रेस संगठन कर्णाली प्रदेश सदस्य रहेको कारण किन बखास्त नगर्ने ?’
तीनैजनाले आफूहरू कुनै पक्षमा नलागेको, तर विगतदेखि नै प्रेस संगठनमा रहेको जवाफ पठाएका थिए । आफूहरू प्रेस संगठनमा रहे पनि काममा बाधा नपारेको पत्रमा उल्लेख गरेका छन् ।
पवन शर्मालाई केपी ओली गुटको जाजरकोटको संयोजक बनाएर बधाई दिएका मेयरले त्यसको एक हप्तापछि प्रचण्ड र माधव गुटनिकट पत्रकारको कर्णाली प्रदेश सदस्यमा तीनैजना कर्मचारीको नाम देखेपछि बर्खास्त गरेका हुन् ।
निजामती कर्मचारीहरूको आधिकारिक ट्रेड युनियनले बिहीबार एक विज्ञप्ति जारी गरी राजनीतिक आस्थाकै आधारमा कर्मचारी बर्खास्ती गर्नु राम्रो नभएको बताउँदै तुरुन्त यो कारबाही फिर्ता गर्न आग्रह गरिएको छ ।
