साबिक विजेता मुम्बई इन्डियन्स आइतबार राति दिल्ली क्यापिटल्सलाई पाँच विकेटले हराउँदै १३औँ इन्डियन प्रिमियर लिग (आइपिएल) को शीर्ष स्थानमा उक्लेको छ ।
अबुधाबीको मैदानमा दिल्लीले पहिलो ब्याटिङ गरी चार विकेटको क्षतिमा एक सय ६२ रनको योगफल बनाएको थियो । स्लो विकेटमा मुम्बईले १९.४ ओभरमा पाँच विकेट गुमाएर एक सय ६६ रन बनायो । मुम्बईलाई अन्तिम ओभरमा सात रन आवश्यकता थियो ।
उत्कृष्ट फर्ममा रहेको दिल्लीमाथिको सानदार जितसँगै मुम्बईले सात खेलबाट १० अंक जोडेको छ । मुम्बईले चालू आइपिएलमा पाँच जित र दुई हारकाे सामना गरेको छ ।
दिल्ली १० अंकका साथ दोस्रो स्थानमा झऱ्याे । एक खेल कम खेलेको कोलकाताले ६ खेलबाट आठ अंक बटुली तेस्रो स्थान मजबुत बनाएको छ । आठ अंकका साथ रोयल्स च्यालेन्जर्स बेंग्लोर चौथो स्थानमा छ ।
आइपिएलको २७औँ खेलमा दिल्लीको सुरुवात निकै कमजोर रह्यो । ओपनर पृथ्वी साउ इनिङको तेस्रो बलमै ट्रेन्ट बोल्टले क्याचआउट गराए ।
त्यसपछि शिखर धवन र अजिन्का राहोनले दोस्रो विकेटका लागि २३ रनको साझेदारी गरे । राहानेले १५ बलमा तीन चौका प्रहार गरी १५ रन नै जोडे ।
मुम्बईको कसिलो बलिङमा दिल्लीका ब्याट्सम्यानले खुलेर रन बनाउन सकेनन् । शिखरले कप्तान श्रेयास इयेरसँग तेस्रो विकेट निमित्त ८५ रनको साझेदारी गर्दै दिल्लीलाई १४.४ ओभरमा १०९–३ को अवस्थामा पुऱ्याए । इयेरले ३३ बलमा पाँच चौका प्रहार गरी ४२ रन जोडे ।
इनिङ्समा धवन नटआउट रहे । उनले ५२ बलमा ६ चौका र एक छक्का प्रहार गर्दै सर्वाधिक ६९ रनको योगदान दिए । अन्तिम तिर मार्कोस स्टोनिसले आठ बलमा १३ रन तथा एलेक्स क्यारेयले नाै बलमा १४ रन बनाए । मुम्बईका लागि हार्दिक पाण्ड्याले २६ रन खर्चेर दुई विकेट लिएका थिए ।
प्रत्युत्तरमा मुम्बईका लागि क्विन्टन डि कोक तथा सूर्यकुमार यादवले समान ५३–५३ रनको योगदान दिए । यी दुवै ब्याट्सम्यानले दोसो विकेट लागि ४६ रन बनाए । क्विन्टनले ३६ बलमा चार चौका र तीन छक्का प्रहार गरेका थिए ।
यादवले इषणसँग चौथो विकेट लागि ५३ रन जोड्दै मुम्बईलाई जितनजिक पुऱ्याए । यादवले ३२ बलमा ६ चौका र एक छक्का प्रहार गरे । इषणले १५ बलमा दुई चौका र दुई छक्का ठोकी २८ रन बनाए । अन्तिम किरन पोलार्डले ११ रन तथा हार्दिक पाण्ड्याले १२ रन जोड्दा मुम्बईले दिल्लीमाथि पाँच विकेटको जित निकाल्यो ।
आइपिएलमा क्विन्टनले १२औँ तथा सूर्यकुमारले नवौँ अर्धसतक लगाएका हुन् । यसैगरी कप्तान रोहित शर्माले मुम्बईबाट एक सय ५० खेल पूरा गरेका छन् । यो सफलता प्राप्त गर्ने रोहित मुम्बईका दोस्रो खेलाडी हुन् । यसअघि पोलार्डले एक सय ५५ खेल खेलेका छन् । दिल्लीका शिखर धवनले आइपिएलमा सय छक्का पूरा गरे ।
उनले आइपिएलमा ३८ अर्धसतकीय खेल्न सफल भए । आइपिएलमा बेंल्लोरका विराट कोहली, मुम्बईकै रोहित शर्मा तथा चेन्नईका सुरेश रेनाले ३८–३८ अर्धसतकीय इनिङ्स खेलेका छन् ।
राजस्थानसँग हैदराबादको हार
यसैगरी आइपिएलमै राजस्थान रोयल्सले सनराइजर्स हैदराबादलाई पाँच विकेटले हराएको छ । हैदराबादले पहिलो ब्याटिङ गरी चार विकेट गुमाएर एक सय ५८ रनको योगफल बनायो ।
प्रत्युत्तरमा राजस्थानले १९.५ ओभरमा पाँच विकेटको क्षतिमा एक सय ६३ रन बनाएको थियो । जितसँगै राजस्थान तालिकाको छैटाैँ स्थानमा उक्लेको छ । राजस्थानले सात खेलमा तीन जित निकाली ६ अंक जोड्यो । हैदराबावाद ६ अंकाका साथ पाँचौँ स्थानमा छ ।
हैदराबादको ब्याटिङमा कप्तान डेभिड वार्नरले ३८ बलमा तीन चौका र दुई छक्का प्रहार गरी ४८ रनको योगदान दिए ।
त्यसपछि मनीष पाण्डेले ४४ बलमा तीन छक्का र दुई चौकाको सहयोगमा ५४ रन बटुले । केन विलियम्सनले २२ रन तथा प्रियामले १५ रन बनाए ।
प्रत्युत्तरमा राजस्थानको सुरुवात खराब रहे पनि मध्यक्रमका ब्याट्सम्यानले सम्हालेका थिए । राजस्थानले पहिलो चार विकेट ९.१ ओभरमा ६३ रनभित्र गुमाएको थियो ।
छैटाैँ विकेटका लागि रियान परागले २६ बला दुई चौका र दुई छक्का प्रहार गरी ४२ रन तथा राहुलले २८ बलमा चार चौका र दुई छक्का प्रहार गरी ४५ रनत जोडेपछि राजस्थानको जित सम्भव भयो ।
हैदराबादले पावर प्लेमा तीन ब्याट्सम्यानलाई आउट गरेको थियो । चालू सिजनमा पावर प्लेमा धेरैपटक विपक्षी ब्याट्सम्यानलाई आउट गर्ने हैदराबाद पहिलो टोली बनेको छ ।
हैदराबादले पावर प्लेमै १३ ब्याट्सम्यानलाई पेभेलियनतर्फ फर्काएको छ । हैदराबादका मनीष तथा वार्नरले दोस्रो विकेटका लागि ७३ रन जोडे । मनीषले आइपिएलमा तीन हजार रन पूरा गर्न सफल भएका छन् ।
यो सफलता प्राप्त गर्ने उनी १६औँ खेलाडी हुन् । यसक्रममा उनले एक सय ३७ खेलमा १ सय २७ इनिङ्स खेलेका छन् । उनले आइपिएलमा एक सतक तथा १७ अर्धसतक जोडेका छन् ।
