धनुषा । धनुषाको धनौजी गाउँपालिका– ३ (साबिक झोझी कटैया गाविसका वडा नं. १ देखि (सम्म) का २३३ परिवारले नापजाँच सम्पन्न भएको करिब ११ वर्षपछि जग्गाधनी प्रमाणपुर्जा (लालपुर्जा) प्राप्त गरेका छन्।
लामो समयदेखि स्ववासीका रूपमा बसोबास गर्दै आएका स्थानीय परिवारले अब आफ्नो जग्गामाथिको कानुनी स्वामित्व औपचारिक रूपमा प्राप्त गरेका हुन्। आवश्यक कानुनी तथा प्रशासनिक प्रक्रिया पूरा भएपछि सम्बन्धित निकायले उनीहरूलाई जग्गाधनी प्रमाणपुर्जा वितरण गरेको हो।
उक्त क्षेत्रको नापजाँच कार्य ०७२ सालमै सम्पन्न भएको थियो। तर, नापजाँच तथा नक्सांकनको काम पूरा भए पनि आवश्यक कानुनी र प्रशासनिक प्रक्रिया पूरा हुन नसक्दा लालपुर्जा वितरणमा ढिलाइ भएको थियो। लामो समयदेखि रोकिएको प्रक्रिया अघि बढेसँगै हाल २३३ परिवारलाई जग्गाधनी प्रमाणपुर्जा वितरण गरिएको हो।
लालपुर्जा प्राप्त भएपछि स्ववासीका रूपमा बसोबास गर्दै आएका परिवारको जग्गामाथिको कानुनी स्वामित्व स्थापित भएको छ। यसबाट स्थानीय बासिन्दालाई जग्गासम्बन्धी कानुनी प्रक्रिया पूरा गर्न तथा आफ्नो सम्पत्तिको उपयोग गर्न सहज हुने अपेक्षा गरिएको छ।
त्यस्तै, जग्गाको स्वामित्व स्पष्ट भएपछि भूमिसम्बन्धी विवाद निरूपण गर्न सहयोग पुग्नेछ। कानुनी प्रावधान र सम्बन्धित संस्थाको मापदण्ड पूरा भएको अवस्थामा जग्गा बैंक तथा वित्तीय संस्थामा धितो राखेर ऋण लिनसमेत सहज हुन सक्नेछ।
