नेपाल एसिसी प्रिमियर कप, २०२६ को समूह ‘ए’मा विजेताका रूपमा अगाडि बढ्न चाहन्छ । मलेसियामा आयोजना भइरहेको एसिसी प्रिमियर कपमा सोमबार नेपालले समूह चरणकै अन्तिम खेलमा चिरपरिचित प्रतिद्वन्द्वी हङकङविरुद्ध प्रतिस्पर्धा गर्दै छ । यो खेल क्वालालम्पुरस्थित वायुमास क्रिकेट ओभलमा हुनेछ । नेपालले हङकङलाई हराउँदा समूह विजेता बन्नेछ । यस्तो अवस्थामा नेपालले सेमिफाइनलमा समूह ‘बी’को उपविजेताविरुद्ध खेल्नेछ ।
समूह ‘बी’को अंकतालिका रोमाञ्चक छ । शीर्ष स्थानमा अपराजित रहेको युएईले सर्वाधिक ६ अंक जोडेको छ । ओमान, कतार र कुवेतले समान ४ अंक जोडेका छन् । कतार र कुवेतले समूहका चार खेल सकाएका छन् । अब ओमान र युएईबिच अन्तिम खेल हुनेछ । युएईसँग पराजित हुँदा ओमान, कतार र कुवेतमध्ये एक टोली सेमिफाइनलमा पुग्नेछन् । युएईलाई हराउँदा ओमानको पनि ६ अंक हुनेछ । यस्तोमा ओमान र युएईबिचको रनरेटका आधारमा समूह विजेताको छिनोफानो हुनेछ । रनरेटमा युएई राम्रो अवस्थामा छ ।
सन्दीप लामिछानेको कप्तानीमा रहेको नेपालले एक खेलअगाडि नै अन्तिम चारको स्थान पक्का गरेको छ । नेपालका मुख्य प्रशिक्षक स्टुआर्ट लले तेस्रो खेलमा साउदी अरेबियाविरुद्ध खेलेका प्लेइङ सेटका खेलाडीलाई मौका दिने सम्भावना छ । सन्दीपसँगै करण केसी, ललित राजवंशी, अलराउन्डर दीपेन्द्रसिंह ऐरी र गुल्सन झाले बलिङमा उत्कृष्ट प्रदर्शन गरिरहेका छन् । ब्याटिङमा रोहितकुमार पौडेल, अर्जुन कुमाल, ईशान पाण्डे र पवन सर्राफले प्रशिक्षक स्टुवार्टका विश्वास तोडेका छैनन् । यसपटक मलेसियाको यात्रामा देव खनालसँगै शेर मल्ल, हेमन्त धामी, अर्जुन र पवनले अवसर पाएका हुन् ।
एसिसी प्रिमियर कपमा नेपालले लगातार ३ खेलमा ६ अंक जोडेको छ । नेपालले पहिलो खेलमा बहराइनलाई सात विकेट, दोस्रो खेलमा मलेसियालाई ६ विकेट तथा तेस्रो खेलमा साउदी अरेबियालाई पाँच विकेटले हराएको थियो । आयोजक मलेसिया र हङकङको समान ४ अंक छ ।
मलेसिया रनरेटमा बलियो हुँदै दोस्रो स्थानमा छ । समूह चरणको अन्तिम खेलमा नेपालविरुद्ध हङकङ गर या मरको स्थितिमा छ । पाँचपटक एसिया कप खेलेको हङकङलाई नेपालविरुद्ध जितको विकल्प छैन । हङकङ समूहमा बहराइनसँग ३२ रनले पराजित भएको थियो । हङकङ नेपालसँग पराजित हुँदा मलेसिया सेमिफाइनलमा पुग्नेछ । मलेसिया र हङकङबिचको खेल टाइ भएपछि भएको सुपर ओभरमा हङकङ नै विजयी भएको थियो । समूहमा समान दुई अंक रहेका साउदी र बहराइन भने बाहिरिसकेका छन् ।
निर्णायक खेलमा युएई र ओमान
समूह ‘बी’मा युएई र ओमानबिच समूह विजेताका लागि प्रतिस्पर्धा हुँदै छ । यसै खेलको विजेताले समूह विजेताको छिनोफनो गर्नेछ । यस समूहमा सिंगापुरले अंक जोड्न सकेन । १० टोली सहभागी लिगको समूह चरणका शीर्ष दुई टोली सेमिफाइनलमा पुग्नेछन् । प्रतियोगिता विजेता एसिया कपमा छनोट हुनेछ । बंगलादेशमा हुने एसिया कपमा यसअघि नै टेस्ट राष्ट्रहरू भारत, श्रीलंका, पाकिस्तान, बंगलादेश र अफगानिस्तान छनोट भइसकेका छन् ।
२०औँ एसियाडको खेल तालिका सार्वजनिक
आगामी असोजमा जापानको नागोया र आइचीमा आयोजना हुने २०औँ एसियन खेलकुद प्रतियोगिताअन्तर्गत पुरुष क्रिकेटको खेल तालिका सार्वजनिक भएको छ । एसियन क्रिकेट काउन्सिल (एसिसी)ले सहभागी राष्ट्रको टुंगो गरे पनि खेल तालिका सार्वजनिक गरेको थिएन ।
नेपालले समूह ‘ए’मा अफगानिस्तान र जापानसँग खेल्नेछ । समूह ‘बी’मा हङकङ, मलेसिया र ओमान छन् । भारत, बंगलादेश, श्रीलंका र पाकिस्तानले सोझै क्वार्टरफाइनल खेल्नेछन् । नेपालको पहिलो खेल २६ सेप्टेम्बरमा अफगानिस्तानसँग हुनेछ भने २७ सेप्टेम्बरमा आयोजक जापानसँग रहेको एसिसीले जनाएको छ ।
नेपालले समूह चरण पार गरे क्वार्टरफाइनलमा भारत वा श्रीलंकामध्ये एक टोलीसँग खेल्नेछ । सन् २०२३ को एसियाडमा नेपाल क्वार्टरफाइनलमा पुगेको थियो । क्वार्टरफाइनलमा नेपाल भारतसँग पराजित भएको थियो । यसपटक नेपालले सिंगापुरमा भएको एसियन खेलकुद छनोटमा अपराजित रहेर एसियाडमा स्थान पक्का गरेको हो ।
