उदयपुरको चौदण्डीगढी नगरपालिका–७ लामाचौरी (कुमाङ) मा शनिबार राति जंगलीहात्तीको बथानले सात घरमा क्षति पुर्याउँदा करिब १५ लाख रुपैयाँबराबरको नोक्सानी भएको छ।
राति करिब ९ बजेतिर गाउँ पसेको १२ देखि १५ वटा बच्चासहितको हात्तीको बथानले घरका बेराघेरा भत्काउनुका साथै अन्नपात, लत्ताकपडा र अन्य सामग्री नष्ट गर्दा क्षति भएको हो ।
इलाका प्रहरी कार्यालय बेल्टारका प्रमुख इन्स्पेक्टर प्रभात लक्ष्मण लिम्बूका अनुसार रक्तामाला सामुदायिक वन क्षेत्रबाट गाउँ प्रवेश गरेको हात्तीको बथानले स्थानीयको घर भत्काउनुको साथै घरमा रहेको अन्नपातसमेत खाइदिएको छ ।
लिम्बूका अनुसार खिलबहादुर मगरको घरमा एक लाख, वृद्धिमाया राईको चार लाख, बमबहादुर विकको दुई लाख, रोशन विकको दुई लाख, लक्ष्मी विकको तीन लाख, वीरबहादुर मगरको दुई लाख र राधा विकको एक लाख रुपैयाँबराबरको क्षति भएको छ ।
हात्ती गाउँमा प्रवेश गरेपछि इलाका प्रहरी कार्यालय बेल्टार र सशस्त्र प्रहरी बल बेल्टार बेस क्याम्पबाट संयुक्त सुरक्षा टोली घटनास्थल पुगेको थियो । प्रहरी र स्थानीयवासीले साइरन बजाएर तथा अन्य उपाय अपनाई हात्तीलाई गाउँबाट जंगलतर्फ फर्काएका थिए । स्थानीयका अनुसार हात्तीको बथान बिहान करिब ४ बजे मात्र जंगल फर्किएको थियो । घटनामा कुनै मानवीय क्षति भने भएको छैन ।
प्रहरीका अनुसार केही दिनअघि सुनसरीबाट सप्तकोशी नदी पार गरी उदयपुर प्रवेश गरेको यही हात्तीको बथानले सुरुमा बेलका नगरपालिकाका विभिन्न क्षेत्रमा अन्नबालीमा क्षति पुर्याएको थियो । त्यसपछि असार १२ गते चौदण्डीगढी नगरपालिका– ३ हात्तीसार क्षेत्रमा प्रवेश गरी केही घरमा सामान्य क्षति पुर्याएको थियो । शनिबार राति भने चौदण्डीगढी– ७ मा ठुलो क्षति भएको हो ।
उदयपुरमा जंगली हात्तीको समस्या बर्सेनि दोहोरिने गरेको भए पनि यस वर्ष गर्मीयाममै हात्ती गाउँबस्तीमा पसेपछि स्थानीय त्रसित बनेका छन् । सामान्यतया जाडोयाममा भारतबाट नेपाल प्रवेश गर्ने हात्तीले बेलका, चौदण्डीगढी, त्रियुगा र कटारी क्षेत्रका बस्ती तथा खेतीबालीमा क्षति पुर्याउने गरेका छन् ।
