अमेरिकी राष्ट्रपति डोनाल्ड ट्रम्पले आफ्नो सामाजिक सञ्जालमा एक पोस्ट गर्दै स्ट्रेट अफ हर्मुजको ‘नौसेना नाकाबन्दी अन्त्य भएको’ घोषणा गरे । ‘यद्यपि, आवश्यक परेमा पुनः नाकाबन्दी लगाउन सक्ने’ ट्रम्पले बताए ।
ट्रम्पले तेहरान ‘उच्चस्तरको आणविक निरीक्षणमा पूर्ण रूपमा सहमत भएको’ पनि दाबी गरे । ‘यदि तिनीहरू यसमा सहमत भएनन् भने, थप वार्ता हुनेछैन,’ ट्रम्पले ट्रुथ सोसियल नामक सामाजिक सञ्जालमा लेखेका छन् ।
ट्रम्पको घोषणा इरान युद्ध अन्त्य गर्ने सम्बन्धमा स्विस सहर बर्गेनस्टकमा पाकिस्तान र कतारको मध्यस्थतामा सम्पन्न पहिलो चरणको महत्वपूर्ण वार्तापछि आएको हो । सम्झौताको एक हिस्साको रूपमा अमेरिकाले आफ्ना बैंकमा रोकिएका इरानी कोषको झन्डै १२ अर्ब डलर निकासा गर्नेछ ।
वार्तापछि अमेरिकाले इरानमाथिको अन्तर्राष्ट्रिय प्रतिबन्ध पनि अस्थायी रूपमा खुकुलो पार्ने घोषणा पनि गरेको छ । जुन व्यवस्थाअनुरूप अब अगस्ट २१ सम्म इरानी तेल र पेट्रोकेमिकलले बजारमा प्रवेश पाउनेछन् । अन्तिम सम्झौतातर्फ ६०–दिने रोडम्यापसहित वार्ता सम्पन्न भयो ।
