ग्लोबल आइएमई बैंक लिमिटेडको अगुवाइमा एक सय ६६ मेगावाट क्षमताको सुपर तमोर जलविद्युत् आयोजनाका लागि वित्तीय व्यवस्थापनसम्बन्धी सम्झौतामा हस्ताक्षर भएको छ । आयोजनाको प्रवर्द्धक कम्पनी क्रिस्टल पावर डेभलपमेन्ट प्रालि र सहभागी बैंकबिच वित्तीय व्यवस्थापनका लागि सम्झौता भएको हो । सम्झौतामा बैंकका प्रमुख कार्यकारी अधिकृत सुरेन्द्रराज रेग्मीसहित सहायक प्रमुख कार्यकारी अधिकृत दीपचन्द्र रेग्मी तथा क्रिस्टल पावरका कार्यकारी प्रमुख कृष्णप्रसाद आचार्यलगायत सहअगुवाइ तथा सहभागी बैंकका प्रतिनिधिले हस्ताक्षर गरेका छन् ।
कुल २५ अर्ब रुपैयाँ अनुमानित लागत रहेको उक्त आयोजनामा ग्लोबल आइएमईको अगुवाइका साथै सिद्धार्थ बैंक, लक्ष्मी सन्राइज बैंक, प्रभु बैंक सहअगुवाइ र कृषि विकास बैंक र नेपाल एसबिआई बैंकको सहभागितामा बनेको कन्सोर्टियमले करिब १९ अर्ब रुपैयाँ लगानी गर्नेछ ।
यसमध्ये ग्लोबल आइएमईले पाँच अर्ब, सिद्धार्थ र लक्ष्मी सन्राइजले चार–चार अर्ब, प्रभुले साढे तीन अर्ब, कृषि विकासले डेढ अर्ब तथा एसबिआई बैंकले एक अर्ब लगानी गर्ने बताइएको छ ।
ग्लोबल आइएमईका सिइओ रेग्मीले उक्त आयोजना निर्धारित समयसीमाभित्र सम्पन्न हुने बताए । यसबाट राज्यको ऊर्जा उत्पादन क्षमतामा वृद्धि हुने र निर्यात प्रवर्द्धनमा सहयोग पुग्ने विश्वास बैंकको रहेको छ ।
ताप्लेजुङको फक्ताङलुङ गाउँपालिकास्थित तमोर नदीमा निर्माण हुने एक सय ६६ मेगावाट क्षमताको जलविद्युत् आयोजनाको अनुमानित लागत २५ अर्ब रुपैयाँ छ । सम्झौताअनुसार बैंकले ७५ प्रतिशत लगानी गर्नेछन् भने बाँकी २५ प्रतिशत रकम संस्थापक तथा अन्य लगानीकर्ताबाट लगानी व्यवस्थापन गरिनेछ ।
