प्रजातन्त्र दिवस यस वर्ष तीन दिन मनाइने

यस वर्षको राष्ट्रिय प्रजातन्त्र दिवस तीन दिनसम्म भव्य रूपमा मनाइने भएको छ। बिहीबार प्रधानमन्त्री सुशीला कार्कीको अध्यक्षतामा सिंहदरबारमा बसेको बैठकले तीन दिन प्रजातन्त्र दिवस मनाउने निर्णय गर्दै मूल समारोह समिति पनि गठन गरेको छ।  

२००७ साल फागुन ७ गते नेपालमा राणा शासनको अन्त्य गरी पहिलोपल्ट प्रजातन्त्र स्थापना भएको दिनको सम्झनामा सरकारले आउँदो फागुन ६, ७ र ८ गते मनाउने निर्णय गरेको हो।
प्रधानमन्त्री अध्यक्ष रहने समितिमा नेपाल सरकारका मन्त्रीहरू, काठमाडौं उपत्यकाका सबै नगरपालिकाका प्रमुखहरू, नेपाल सरकारका मुख्यसचिव, प्रधान सेनापति, नेपाल सरकारका सचिवहरू, नेपाल प्रहरी, सशस्त्र प्रहरी बल र राष्ट्रिय अनुसन्धान विभागका प्रमुखहरू सदस्य छन्। गृह मन्त्रालयका सचिव मूल समारोह समितिका सदस्य–सचिव छन्। 

तीन दिनसम्म नेपालभर र विदेशस्थिति नेपाली दूतावास, कूटनीतिक नियोग तथा वाणिज्य दूतावासहरूमा विभिन्न कार्यक्रम गर्ने सरकारको तयारी छ। मूल समारोहको कार्यक्रम काठमाडौंको सैनिक मञ्च टुँडिखेलमा गरिनेछ।

बैठकमा प्रधानमन्त्रीले के भनिन्? 
राष्ट्रिय प्रजातन्त्र दिवस फागुन ७ हाम्रा लागि एकदमै महत्त्वपूर्ण छ। यसबिचमा हामीले पटक-पटक प्रजातन्त्रका लागि संघर्ष गर्नुपरेको छ। ती सबै आन्दोलन र नेपाली जनताले गरेको बलिदानी र त्यसबाट भएका उपलब्धिको प्रतीक हो यो दिन। 

देशमा पछिल्लो समय केही सकारात्मक परिवर्तन देखिन थालेको छ। भदौ २३ र २४ गते भएको आन्दोलनले मुलुकमा परिवर्तन ल्याएको छ। देशमा अलिकति परिवर्तन आएको छ। हरेक ठाउँमा नयाँ युवाहरूलाई ठाउँ दिनुपर्ने भावना आएको छ मुलुकमा। यही भावनाबाट प्रजातन्त्र फस्टाउँछ र विकसित हुन्छ।

यो दिन एकै प्रयासमा सम्भव भएको होइन। हाम्रो समाज सधैँ आन्दोलित नै रह्यो। गत भदौ २३ र २४ मा त झन् यति ठुलो भेल आयो कि, साइक्लोनजस्तै आयो। 

लोकतन्त्र स्थापित गर्ने मात्र होइन। लोकतन्त्रको बाटोमा हामी हिँड्नुपर्यो। देश लोकतन्त्रको बाटोमा जानुपर्यो। लोकतन्त्रको अभ्यास गर्नुपर्यो। व्यवहार लोकतन्त्र देखिनुपर्यो। जनताको र युवाको चाहनाबमोजिम काम गरेर देखाउनुपर्यो। त्यसैले हामीले प्रजातन्त्र दिवसलाई थप महत्त्व दिनुपरेको हो।

२००७ सालदेखि जेन-जी आन्दोलन कतिले ज्यान गुमाउनुपर्यो? कतिपटक आन्दोलन गर्नुपर्यो? त्यसको स्मरण गरौँ। ती सहिदहरूको सम्मान गरौँ। तिनको बलिदानीलाई सम्झौँ र उहाँहरूको सपनालाई वास्तवमै साकार पार्न लागौँ। 

एउटा प्रण गरौँ, अठोट गरौँ– आगामी दिनमा हरपुस्ताले लडाइँ लड्न नपरोस्। प्रत्येक देशवासीले शान्तिसँग बाँच्न पाऊन्। अबको बाटो शान्तितिर होस्। शान्ति भए मात्र देशमा विकास हुन्छ। सबै जातजाति, धर्म, संस्कृति, वर्ग र समुदायबिच एकता र सहयोगको भावना होस्। 
जेन-जी योद्धाहरूले देखाएका विसंगति मेटाएर जानुपर्छ अब। सबैभन्दा माथि एकता र मानवता हुनुपर्छ।