पाँचौँपटक थपिएको म्याद सकिँदा पनि बनेन संसद् भवन

सिंहदरबारस्थित पुतली बगैँचामा निर्माणाधीन संसद् भवन पाँचौँपटक थपिएको म्याद सकिँदा पनि बनेन । पाँचौँपटक थपिएको म्याद बिहीबार सकिँदा ८९ प्रतिशत मात्रै प्रगति भएको हो । ठेकेदार कम्पनी तुँदी–शेक जेभीले अझै नौ महिना समय थप्न माग गरेको छ । सरकारले भने आगामी असारसम्मका लागि छैटौँपटक म्याद थप्ने तयारी गरेको छ ।

तीन वर्षभित्र निर्माण सक्ने गरी ठेक्का लागेको भवन सात वर्ष बितिसक्दा पनि पूरा नभएको हो । तत्कालीन प्रधानमन्त्री केपी ओलीले १ असोज ०७६ मा भवनको शिलान्यास गरेका थिए । भवन निर्माणको जिम्मा सहरी विकास तथा भवन निर्माण विभागको हो । विभागका महानिर्देशक रवीन्द्र बोहराले आगामी असारसम्म समय लाग्न सक्ने बताए ।

‘नयाँ संसद् भवनको भौतिक प्रगति करिब ९० प्रतिशत छ । निर्माण व्यवसायीबाट थप नौ महिना माग भएको छ । कति सयम थप्दा ठिक हुन्छ भनेर हामी विश्लेषण र छलफलमै छौँ,’ उनले भने, ‘१२ वटा बिल्डिङको फिनिसिङको काम बाँकी छ । इन्टेरियरको काम पनि सुस्त नै हुने भएकाले समय लाग्छ । आगामी असारसम्म सम्पन्न हुने हाम्रो अनुमान छ ।’ आर्थिक हिसाबकिताबतर्फ भने साढे पाँच अर्बमा डेढ अर्ब मात्रै दिन बाँकी रहेको बोहराले बताए । 

जेन–जी आन्दोलनपछि नागरिक सरकारमा सहरी विकास मन्त्रालयको जिम्मेवारी सम्हालेका मन्त्री कुलमान घिसिङले आयोजनाका परामर्शदाता र निर्माण व्यवसायीसँग छलफल गरेर पुसभित्रै निर्माण सम्पन्न गर्न निर्देशन दिएका थिए । त्यसपछि मन्त्री घिसिङ छड्केमा पनि पुगेर श्रमिक र कामको सिफ्ट बढाउन निर्देशन दिएका थिए । तर, यति गर्दा पनि निर्माण कार्यले गति लिन सकेको छैन । घिसिङजस्तै यसअघिका विभागीय मन्त्रीहरू, प्रधानमन्त्री, सभामुख, राष्ट्रिय सभा अध्यक्ष, संसदीय समितिदेखि राष्ट्रपतिसम्मले निर्माणाधीन भवनको अवलोकन गरेर चाँडो सकाउन निर्देशन दिएका थिए । 

जेन–जी आन्दोलनका क्रममा बानेश्वरस्थित संसद् भवनमा आगजनी भएपछि संसद् बैठक बस्न हल छैन । प्रतिनिधिसभा विघटन भई आगामी २१ फागुनका लागि निर्वाचन घोषणा भएको छ । निर्वाचनको नतिजा नआउँदासम्मलाई प्रतिनिधिसभा छैन । तर, नयाँ प्रतिनिधि चुनिएर आउँदा पनि संसद् हल नबन्ने चिन्ता बढ्न थालेको छ । त्यसो त, सधैँ कायमै रहने राष्ट्रिय सभाको अधिवेशन बोलाउने तयारी हुँदा पनि बस्ने हल छैन । यद्यपि, संसद् सचिवालयपरिसरको कृषि समितिको हललाई पुनर्निर्माण गरेर राष्ट्रिय सभाका लागि तयार पारिँदै छ । यदि तोकिएको समयमै नयाँ संसद् भवन बनेको भए अर्को तयारी गर्नुपर्ने थिएन । 

विभागका महानिर्देशक बोहराका अनुसार दुई प्याकेजमा काम भइरहेको छ । मुख्य भवनको काम तुँदी–शेक जेभीले गरिरहेको छ भने इन्टेरियर, फल्स सिलिङ, फर्निचर, डिभाइस, कम्प्रेसलगायतको काम श्यामसुन्दर बानियाँ प्रालिले गरिरहेको छ । अहिले भवनभित्र फायर फाइटिङ, सिस्टम जडान प्रक्रिया, इलेक्ट्रिक्सको काम, स्लिपर सिस्टम, पाइपलाइन, इन्टेरियर वाल, मार्बल ग्रेनाइट हाल्ने काम भइरहेको छ ।

त्यस्तै, सेन्ट्रल डोमको ट्रसको काम सकेर छानाको कभरिङ सुरु हुँदै छ । फर्निचरहरू धमाधम बनाउने र फिटिङ गर्ने काम भइरहेको छ । कन्फ्रेसिन्ङ सिस्टमको डिभाइस, सेक्युरिटी सिस्टम, बडी स्क्यानर ल्याउने तयारी छ । मुख्य हलहरूको फल्स सिलिङको काम पनि भइरहेको छ । बोहराले भवनपरिसरको बाटोमा ग्राभेल सकिएको र सेभिङ गर्ने काम भइरहेको बताए । पार्किङको पनि फल्सको काम भइरहेको र बगैँचामा दुबो रोप्ने काम भने भइसकेको उनको भनाइ छ । 

१५१ रोपनी क्षेत्रफलमा निर्माणाधीन भवनमा आठ ब्लक छन् भने १२ छुट्टाछुट्टै भवन छन् । जहाँ चार सय सिट क्षमताको प्रतिनिधिसभा र एक सय सिट क्षमताको राष्ट्रिय सभा हुनेछ । मुख्य भवनसँगै सहायक भवनहरू छन् । जहाँ संसदीय दलको कार्यालय, समितिको हल, दुइटा संसद् सचिवालय भवन, पुस्तकालय, संग्रहालय, चमेनागृहलगायत रहनेछन् । भिभिआइपीका लागि छुट्टै भवन, सुरक्षाकर्मी बस्ने ठाउँसहित संरचना तयार हुँदै छ । 

 ठेकेदार कम्पनीले फेरि माग्यो थप नौ महिना समय
जेन–जी आन्दोलनका क्रममा बानेश्वरस्थित संसद् भवनमा आगजनी भएपछि संसद् बैठक बस्न हल छैन । प्रतिनिधिसभा विघटन भई आगामी २१ फागुनका लागि निर्वाचन घोषणा भएको छ । निर्वाचनको नतिजा नआउँदासम्मलाई प्रतिनिधिसभा छैन ।

१ असोज ०७६ मा तीन वर्षभित्र निर्माण सम्पन्न गर्ने गरी शिलान्यास भएको सिंहदरबारमा निर्माणाधीन नयाँ संसद् भवनको पाँचौँपटक थपिएको म्याद पनि बिहीबार सकिँदा भवनको भौतिक प्रगति करिब ९० प्रतिशत मात्रै भएको छ ।

ठेकेदार कम्पनी तुँदी–शेक जेभीले अझै नौ महिना समय थप्न माग गरेको छ । सरकारले भने आगामी असारसम्मका लागि छैटौँपटक म्याद थप्ने तयारी गरेको छ । त्यसैले नयाँ प्रतिनिधि चुनिएर आउँदा पनि संसद् हल नबन्ने चिन्ता बढ्न थालेको छ । भवन निर्माणको जिम्मा सहरी विकास तथा भवन निर्माण विभागको हो । विभागका महानिर्देशक रवीन्द्र बोहराले आगामी असारसम्म समय लाग्न सक्ने बताए ।

राष्ट्रिय सभाको अल्पकालीन हल अन्तिम चरणमा : साउन्डसिस्टम जडान गरेर आइतबार डेमो लिने तयारी 
नयाँ भवनमा हल तयार नहुँदासम्मका लागि राष्ट्रिय सभा सञ्चालन गर्न भने सिंहदरबारभित्रै कृषि समितिको हललाई परिमार्जन गरिँदै छ । २३ र २४ भदौको जेन–जी आन्दोलनमा नयाँ बानेश्वरस्थित संघीय संसद् भवन आगजनीले ध्वस्त भएसँगै सधैँ कायमै रहने राष्ट्रिय सभाको बैठक बस्ने ठाउँ छैन । सिंहदरबारमा कृषि समितिको हललाई परिमार्जन गरेर राष्ट्रिय सभाका लागि तयार पारिएको संसद् सचिवालयका प्रवक्ता एकराम गिरीले बताए । साउन्डसिस्टमहरू जोडेर आइतबार प्रारम्भिक परीक्षण गरिने उनको भनाइ छ । 

राष्ट्रिय सभा अध्यक्ष नारायण दाहालले दुई दिनअघि प्रधानमन्त्री सुशीला कार्कीलाई भेटेर हिउँदे अधिवेशन आह्वान गर्न आग्रह गरिसकेका छन् । कांग्रेसले हिउँदे अधिवेशन बोलाउन अध्यक्ष दाहाललाई ज्ञापनपत्र नै दिएको छ । हल तयार भएपछि पुसको अन्तिम साता अधिवेशन बोलाउने सरकारको तयारी छ ।