साबिक विजेता जनकपुर बोल्ट्सले शुक्रबार लुम्बिनी लायन्सविरुद्ध प्रतिस्पर्धा गर्दै छ । त्रिवि अन्तर्राष्ट्रिय क्रिकेट रंगशालामा यी दुवै टोलीले ‘गर या मर’को स्थितिमा खेल्नेछन् । जितले लुम्बिनीको प्लेअफ स्थान पक्का हुनेछ । हारले जनकपुर प्लेअफ दौडबाट बाहिरिनेछ ।
लुम्बिनीको तुलनामा जनकपुरलाई भने यो खेल अति नै महत्वपूर्ण छ । जनकपुरले जितबाहेक अन्य नतिजाको कल्पना गरेको छैन । प्लेअफमा पुग्न लुम्बिनीलाई जित आवश्यक छ । लुम्बिनीले ६ खेलमा समान तीन जित र हार निकाली ६ अंक जोडेको छ । जनकपुरले पाँच खेलबाट दुई अंक बुटलेको छ । जनकपुरले पछिल्लो खेलमा चितवनमाथि ६ विकेटको सानदार जित निकालेको थियो । लगातार चार खेल गुमाएका कारण साबिक विजेता जनकपुर कमजोर अवस्थामा रहेको हो ।
लुम्बिनी पछिल्लो दुई खेलमा फर्ममा छ । उसले पोखरा एभेन्जसर्समाथि तीन विकेट र विराटनगर किंग्सलाई पाँच विकेटले पाखा लगाएको थियो । राष्ट्रिय टोलीका कप्तान रोहितकुमार पौडेलको नेतृत्वमा रहेको लुम्बिनीले कर्णाली, काठमाडौं र सुदूरपश्चिमसँगको खेल गुमाएको थियो । उसले आफ्नो पहिलो खेलमा चितवनलाई ६ विकेटले हराएको थियो । त्यसपछिका तीन खेलमा लुम्बिनीले आफ्नो लय गुमायो । जनकपुर भने सुरुदेखि असन्तुलित टोलीका रूपमा रह्यो । स्वदेशी तथा विदेशी खेलाडीले गतिलो प्रदर्शन गर्न सकेनन् । जनकपुरको ब्याटिङमा सुधार आए पनि बलिङ भने कमजोर नै छ ।
त्रिवि मैदानमा अहिले स्पिनर हावी भइरहेका छन् । विराटनगरविरुद्ध शेर मल्लले कसिलो बलिङ गर्दै तीन विकेट लिएका थिए । उनले जनकपुरको ब्याटिङमा आफ्नो अफ ब्रेक बलिङले समस्या बनाउन सक्छन् । ब्याटिङमा चम्किरहेका डार्सी सर्टले जनकपुरको कमजोर बलिङको फाइदा लिन सक्छन् । जनकपुरले उनलाई सुरुमै रोक्नुपर्ने हुन्छ । स्पिनर ललितनारायण राजवंशी जनकपुरका अनुभवी स्पिनर हुन् । उनले लुम्बिनीका ब्याट्सम्यानलाई रन बनाउन रोक्नुपर्ने जिम्मेवारी वहन गर्नुपर्छ ।
एनपिएलको पहिलो संस्करणमा जनकपुरले लुम्बिनीमाथि रोमाञ्चक १ रनको जित निकालेको थियो । पहिलो ब्याटिङ गरेको जनकपुरले २० ओभरमा नौ विकेट गुमाएर १३६ रन बनायो । लुम्बिनीले २० ओभरमा आठ विकेटको क्षतिमा १३५ रन जोड्दा १ रनले हारको सामना गर्यो । त्यसवेला जनकपुरका लागि हर्ष ठाकरले २३ रन खर्चेर पाँच विकेट लिएका थिए ।
प्लेयर्स टु वाच
अनिल साह (जनकपुर)
जनकपुरले पहिलो संस्करणको उपाधि जित्दा अनिलले कप्तानी गरेका थिए । चालू सिजनमा उनको कप्तानीमा जनकपुरले लगातार खेल गुमायो । त्यसपछि उनी ड्रप मात्र भएनन्, कप्तानीको जिम्मेवारी पनि गुमाए । चितवन राइनोजसँगको प्रतिस्पर्धामा अनिल टोलीमा फर्किए । कमब्याक खेलमा उनले बलिङ र ब्याटिङमा उत्कृष्ट प्रदर्शन गरेका थिए । उनकै अलराउन्ड प्रदर्शनका कारण जनकपुरले पाँचौँ खेलमा जित निकाल्यो । चितवनलाई हराउँदा अनिलले ६१ रन बनाउनुका साथ एक विकेट हात पारेका थिए । लुम्बिनीसँगको खेलमा उनीबाट यस्तै प्रदर्शनको अपेक्षा राखिएको छ ।
आसिफ शेख (जनकपुर)
जनकपुरले विकेटपछाडि सबैभन्दा विश्वास गरेका खेलाडी आसिफ हुन् । सुरुका दुई खेलमा उनले विकेटकिपिङ गरेनन् । काठमाडौं र विराटनगरविरुद्ध उनले ब्याटिङमा आफूलाई केन्द्रित बनाएका थिए । पोखरा, सुदूरपश्चिम र चितवनसँगको प्रतिस्पर्धामा आसिफले आफ्नो नियमित विकेटकिपिङको जिम्मेवारी वहन गरे । ब्याटिङमा उनले उद्घाटन खेलमा काठमाडौंविरुद्ध ५४ रनको योगदान दिएका थिए । सुदूरपश्चिम र पोखराविरुद्ध उनले रन बनाउन सकेनन् । विकेटपछाडि आसिफले दुई क्याच लिएका छन् । लुम्बिनीविरुद्ध उनले विकेटकिपिङका साथै उत्कृष्ट ब्याटिङ प्रदर्शन गर्नुपर्ने हुन्छ ।
दिलीप नाथ (लुम्बिनी)
लुम्बिनीलाई पावर प्लेमा उत्कृष्ट सुरुवात दिलाउने जिम्मेवारी ओपनर ब्याट्सम्यान दिलीपको काँधमा छ । उनी पछिल्ला दुई खेलमा चल्न सकेनन् । उनी ओपनिङमा नचलेको खेलमा लुम्बिनीले जित हात पारेको छ । दिलीपले काठमाडौं र सुदूरपश्चिमविरुद्ध भने औसत प्रदर्शन गरेका थिए । उनले सुदूरपश्चिमसँगको खेलमा ३१ तथा काठमाडौंविरुद्ध २५ रन बटुलेका थिए । टोलीलाई आवश्यक भएको अवस्थामा उनी विकेटकिपिङ पनि गर्न सक्छन् । सुदूरपश्चिम र काठमाडौंविरुद्ध उनले विकेटकिपिङ गरेका थिए । ब्याटिङ र विकेटकिपिङ गर्न सक्ने क्षमता भएका दिलीप प्रभाव पार्ने खेलाडीमा रहन सक्छन् ।
रोहित पौडेल (लुम्बिनी)
लुम्बिनीले विराटनगरलाई पाखा लगाएको खेलमा कप्तान रोहित शून्य रनमा आउट भएका थिए । चालू एनपिएलमा उनी यही एक मात्र खेलमा डकआउट भएका हुन् । यसबाहेक अन्य खेलमा उनले ब्याटिङमा लगभग एकनासको प्रदर्शन गरेका थिए । विराटनगरसँग बाहेक अन्य खेलको औसत हेर्दा उनले ३० रनभन्दा माथिको योगदान गरेका थिए । लुम्बिनीको मध्यक्रमलाई सम्हालिरहेका रोहितले साझेदारीमा साथीहरूलाई गतिलो साथ दिइरहेका छन् । लुम्बिनीले ब्याटिङ अर्डरमा स्वदेशी खेलाडीमा धेरै विश्वास गरेका खेलाडी उनी हुन् । जनकपुरको कमजोर बलिङमा उनले आफ्नो पुरानो फर्म भेटाउने प्रयास गर्नेछन् ।