दुई दिनदेखि लगातार परेको वर्षाका कारण धान काटेर बिटा लगाउन ठिक्क पारेको धान खेतमा नै पानीले भिजेपछि रामेछापका किसानहरू चिन्तित बनेका छन् ।
खेतमा लगाइएको धान पाकेर पहेँलपुर भएसँगै रामेछापका किसानले धान काट्न सुरु गरेका थिए । कात्तिकको दोस्रो हप्ता लाग्दा पनि दिउँसो चर्को घाम लागेका कारण किसानले पानी पर्ला भन्ने कुनै भेउ पाएनन् । जसका कारण खेतमा पाकेको धानबाली काटेर खेतमा नै सुकाएका थिए ।
केहीले काटेको धान समयमा नै बिटा लगाएर अन्नपात घरमा भित्र्याएका थिए । अधिकांश किसानहरूले भने धान काटेर खेतमा नै सुकाएका र बिटा नै लगाउन नपाउँदै पानी परेर धान भिजाएपछि निराश छाएको मन्थली नगरपालिका– ७, भटौलीका कृषक रामचन्द्र शर्माले जानकारी दिए । उनले भने, ‘अघिपछि टन्टालपुर घाम लाग्ने गर्दथ्यो । पानी पर्ने कुनै छेकछन्दै थिए । मलगायत धेरै किसानले एकैपटक सयौँ रोपनी खेतमा लगाइएको धान पाकेर पहेँलपुर भएपछि काट्यौँ । धान काटेर खेतमा नै सुकाएका छौँ । केहीले धान बिटा लगाएर भित्र्याए । मलगाएत धेरै किसानले बिटा लगाउन नै पाएनौँ ।’ यो बेमौसमका समयमा पानी परेर धान बाली नष्ट गर्दा सारै दुःख लागेको शर्माले बताए ।
बंगालको खाडीमा विकसित चक्रवात ‘मोन्था’ भारत हुँदै नेपालको मध्यभूभाग नजिक आएर पूर्वतर्फ सर्दै सोही चक्रवातको कारण दुई दिनदेखि निरन्तर वर्षा भइरहेको छ । सो वर्षाका कारण पाकेको धान काटन ठिक्क परेका किसानले धान काट्न पाएनन् भने काटिसकेको धान पनि बिटा लगाउन नपाउँदा किसानले धानसमेत भित्र्याउन पाएनन् । खेतमा दिनरात पाकेको धान काट्न, बिटा लगाउन, धान बोक्न, पराल कुन्यु लगाउन व्यस्त रहने किसान यतिखेर फुर्सदिलो भएको लिखु तामाकोशी गाउँपालिका– ६ की अप्सरा दाहालले बताइन् ।
रामेछापमा धानखेतीको लागि सात हजार ८५९ हेक्टर क्षेत्रफल जमिन उपयुक्त भए तापनि यस वर्ष सात हजार दुई सय हेक्टर क्षेत्रफलमा मात्रै धानखेती गरिएको छ । गएको वर्ष रामेछापमा सात हजार आठ सय हेक्टर क्षेत्रफलमा धानखेती लगाइएको कृषि विकास कार्यालय रामेछापका प्रमुख प्रमोदप्रसाद दाहालले जानकारी दिए ।
हाल रामेछापको मन्थली नगरपालिकाको मन्थली, भटौली, बारीखेत, खाँदबारी, बोद्ने, खाँडादेवी गाउँपालिकाको माडी, सित्खा फाँट, दोरम्बा शैलुङ गाउँपालिकाको रजमन्टार फाँट, लिखु तामाकोशी गाउँपालिकाको खिम्ती, रातमाटा र रामेछाप नगरपालिकाको साँघुटार फाँटलगायतका क्षेत्रमा उल्लेख्य रूपमा धाखेती गरिँदै आएको छ ।
