अमेरिकी राष्ट्रपति डोनाल्ड ट्रम्पले आफ्नो आगामी एसिया भ्रमणका क्रममा उत्तर कोरियाली नेता किम जोङ उनसँग भेट्न चाहेको बताएका छन् । ‘म तपाईंलाई भेट्न चाहन्छु । यदि तपाईं आफ्नो कुरा भन्न चाहनुहुन्छ भने म यसका लागि खुला छु,’ अमेरिकी राष्ट्रपतिले एसिया भ्रमण प्रस्थान गर्ने क्रममा पत्रकारलाई भने । किमसँग आफ्नो राम्रो सम्बन्ध रहेको उनले बताए । ट्रम्पले उत्तर कोरियाको भ्रमणका मामलामा आफ्नो पहिलो कार्यकालमा इतिहास रचे । उनी सन् २०१९ मा अन्तिमपटक हात मिलाएर उत्तर कोरियाको भूमिमा पाइला राख्ने पहिलो बहालवाला अमेरिकी राष्ट्रपति बने ।
सुरुमा किमलाई ‘सानो रकेट मानिस’ भनेर व्यंग्य गर्दै ट्रम्पले किमको आलोचना गरेका थिए । उनले आणविक हतियार बनाउने प्रयासहरूप्रति असामान्य दृष्टिकोण अपनाएका थिए । कम्युनिस्ट अधिनायकवादी राज्य उत्तर कोरिया विश्व मञ्चमा धेरै हदसम्म एक्लो छ । ट्रम्पको अघिल्लो कार्यकालमा यी जोडीले तीनपटक आमनेसामने भेटेका थिए, तर आणविक निशस्त्रीकरण कार्यक्रममा सहमति हुन सकेनन् । उत्तर कोरियाले त्यसवेलादेखि अन्तरमहादेशीय क्षेप्यास्त्रहरूको धेरै परीक्षण गरिसकेको यसका छिमेकीले बताएका छन् ।
उत्तर कोरियालाई आणविक राज्यका रूपमा मान्यता दिने कि नदिने भन्ने प्रश्नमा ट्रम्पले पत्रकारहरूलाई भने, ‘मलाई लाग्छ कि तिनीहरू एक प्रकारको आणविक शक्ति हुन् । उनीहरूसँग धेरै आणविक हतियारहरू छन्, म त्यही भन्छु ।’ किमले आफू ट्रम्पलाई फेरि भेट्न तयार भएको, तर त्यसका लागि अमेरिकाले उत्तर कोरियालाई लगाउँदै आएको प्रतिबन्ध रोक्नुपर्ने बताएको छ । उसका आणविक हतियार त्याग्न अमेरिकाले बेतुकका माग बन्द गर्नुपर्ने पनि उत्तर कोरियाको भनाइ छ । राज्य सञ्चालित मिडियाका अनुसार किमले गत महिना एक भाषणमा भनेका थिए, ‘मलाई अझै पनि राष्ट्रपति ट्रम्पको राम्रो सम्झना छ ।’
उत्तर र दक्षिण कोरियाबिचको सम्बन्ध हेर्ने दक्षिण कोरियाका एकीकरणमन्त्री चुङ डोङ–यङले एसिया प्रशान्त आर्थिक सहयोग (एपेक) फोरमको सम्मेलनमा दक्षिण कोरियामा रहँदा ट्रम्पले किमलाई भेट्ने ‘धेरै’ सम्भावना रहेको बताएका छन् । समाचार एजेन्सी एएफपीका अनुसार यसअघि पनि ट्रम्पको भेट्ने कार्यतालिका थिएन् तर उनले सामाजिक सञ्जालमा निमन्त्रणा दिएपछि दुई कोरियाबिचको नि:शस्त्र क्षेत्रमा उनीहरूको अन्तिम भेट भएको थियो ।
