दोस्रो संस्करणको नेपाल प्रिमियर लिग (एनपिएल) सुरु हुनुअगाडि नै कीर्तिपुरमा रहेको त्रिभुवन अन्तर्राष्ट्रिय क्रिकेट मैदानको निर्माणकार्य पूरा हुने भएको छ । नेपाल क्रिकेट संघ (क्यान)का सचिव पारस खड्काले बिहीबार ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङलाई निर्माणाधीन क्रिकेट रंगशालाको निर्माणकार्य अनुगमन क्रममा एनपिएलअगाडि निर्माण सम्पन्न हुने जानकारी दिएका हुन् । मन्त्री घिसिङले बिहीबार निर्माणाधीन क्रिकेट मैदानको अनुगमन गरेका हुन् ।
१–२७ मंसिरसम्म एनपिएल हुँदै छ । राष्ट्रिय गौरवको आयोजनामा समावेश त्रिवि क्रिकेट मैदानमा सिट राख्ने काम सकिएको छ । अहिले फ्लर्ड लाइट जडानकार्य भइरहेको क्यानका सचिव खड्काले बताए । ‘विभिन्न फेजमा यहाँ काम भइरहेका छन् । सिट जडानकार्य पूरा भइसकेको छ, अब महत्वपूर्ण काम भनेको यहाँ फ्लर्ड लाइट राख्ने काम हो,’ मन्त्री घिसिङलाई जानकारी दिँदै खड्काले भने ।
मन्त्री घिसिङले अनुगमनपछि काम अन्तिम चरणमा पुगेको बताउँदै एक महिनाभित्र निर्माण सकिने बताएका छन् । ‘पहिलो फेजको काम अन्तिम चरणमा पुगेको छ । ६ वटा फ्लर्ड लाइट एक महिनाभित्र राखिसक्ने भनेर प्रतिबद्धता गर्नुभएको छ,’ उनले भने, ‘प्यारापिटको काम लगभग सकिएको छ । ठेक्का पाएको कम्पनीले प्यारापिट एक हप्ताभित्रमै हस्तान्तरण गर्ने भन्नुभएको छ ।’
१० हजार क्षमताको प्यारापिट
मैदानको पहिलो चरणमा दर्शक बस्ने नम्बरसहितको प्यारापिट बनाउने थियो । निर्माण कम्पनीले पहिलो चरणको काम पूरा गरेको छ । ‘एनपिएलअगाडि काम सम्पन्न हुनेछ । अहिले १० हजार दर्शकलाई अटाउन सक्ने प्यारापिट बनेको छ,’ मन्त्री घिसिङले भने, ‘यो हाम्रो एकदमै महत्वपूर्ण रंगशाला हो । त्यसैले अब दोस्रो फेजको काम एकैपटक गर्नुपर्छ भनेर हामीले भनेका छौँ ।’ उनका अनुसार सबै काम सक्दा त्रिवि क्रिकेट मैदानमा ३० हजार दर्शक अट्ने रंगशाला बन्नेछ । अन्तर्राष्ट्रियस्तरमा क्रिकेटमा ख्याति कमाएको खेलका लागि क्रिकेट मैदान बनाउन उच्च प्राथमिकतामा राखेर अगाडि बढाउनुपर्ने उनले बताए । ‘निर्माणकार्यलाई अगाडि बढाउन बजेटका लागि अर्थ मन्त्रालयले पनि सहयोग गर्छ । अब दोस्रो चरणको पनि हामी चाँडै नै टेन्डर प्रक्रियामा जान्छौँ,’ मन्त्री घिसिङले भने ।
गत वर्षको फागुनदेखि मैदानमा प्यारापिटमा कुर्सी जडान र फ्लडलाइट निर्माणकार्य सुरु भएको थियो । २४ वैशाखभित्र निर्माणकार्य सक्ने योजना भए पनि निर्धारित समयमा पूरा हुन सकेन । अहिले समय थप गरेर निर्माण कार्यलाई तीव्रता दिइएको छ । मैदानमा चोभार एन्डतर्फ प्यारापिट निर्माणको काम सकिएको छ । चोभार एन्डतर्फको क्यामरा बक्सको दायाँ र बायाँ भागमा निर्माण भएको प्यारापिटमा अहिले सिट हाल्ने काम पनि सकिएको छ ।
खेलाडीका नाममा हुलाक टिकट प्रकाशन
हुलाक सेवा विभागले बिहीबार नेपाली क्रिकेट खेलाडीको तस्बिर अंकित हुलाक टिकट प्रकाशन गरेको छ । नेपाली क्रिकेट खेलाडीको तस्बिर अंकित हुलाक टिकटमा सञ्चार तथा सूचना प्रविधिमन्त्री जगदीश खरेल र राष्ट्रिय खेलकुद परिषद्का सदस्य सचिव टंकलाल घिसिङले हुलाक सेवा विभागमा आयोजित एक कार्यक्रममा सार्वजनिक गरेका हुन् । विश्व हुलाक दिवस २०२५ का अवसरमा आइसिसी पुरुष विश्वकप र आइसिसी महिला यू–१९ विश्वकप प्रतियोगितामा सहभागी खेलाडीको तस्बिर अंकित हुलाक टिकटमा टाँचा लगाउनुका साथै प्रदर्शनी गरिएको छ । खेलकुदको माध्यमबाट अन्तर्राष्ट्रिय कूटनीतिक सम्बन्ध विस्तारमा महत्वपूर्ण भूमिका खेलेका क्रिकेट खेलाडीको सम्मानका लागि हुलाक टिकट प्रकाशन गरिएको हुलाक सेवा विभागले जनाएको छ । विभागले ०८१ चैत १७ को निर्णयअनुसार १० रुपैयाँ दरको पाँच लाख प्रति हुलाक टिकट प्रकाशन गरेको हो । नेपालले सन् २०२४ को १ देखि २९ जुनसम्म अमेरिका र वेस्ट इन्डिजमा भएको नवौँ टी–२० विश्वकप खेलेको थियो । यू– १९ विश्वकप क्रिकेटमा महिला खेलाडीले प्रतिस्पर्धा गरेको थियो ।
