सल्यानका किसानले एकै सिजनमा दुई करोड रुपैयाँभन्दा बढी मूल्यका बिरुवा बिक्री गरेका छन् । कृषि विकास कार्यालय सल्यानका अनुसार असार मसान्तसम्म किसानले सुन्तला, कागती, ओखर र किवीका गरी तीन लाख ९३ हजार बिरुवा बिक्री गरेका हुन् ।
व्यावसायिक रूपमा नर्सरी सञ्चालन गरिरहेका करिब २५ जना किसानले उत्पादन गरेका बिरुवा जिल्ला र जिल्लाबाहिर बिक्री भएको हो । ५७ हजार चार सय ५० बिरुवा जिल्लामा खपत भएका छन् भने बाँकी तीन लाख २५ हजार पाँच सय ५० बिरुवा जिल्लाबाहिर निकासी भएको कार्यालयका सूचना अधिकारी ईश्वरीनारायण घर्तीले जानकारी दिए । सल्यानबाट जाजरकोट, कालीकोट, दैलेख, बाजुरा, अर्घाखाँची, पाल्पा, गुल्मी, स्याङ्जा, कास्कीलगायतका जिल्लामा विभिन्न प्रजातिका बिरुवा जाने गर्छन् ।
सल्यानमा सबैभन्दा धेरै सुन्तलाका बिरुवाको माग रहेको उनले बताए । जिल्लाभित्र ३४ लाख ३५ हजार तीन सय रुपैयाँबराबर र जिल्लाबाहिर एक करोड ९४ लाख ६६ हजार सात सय रुपैयाँबराबरका बिरुवा निकासी भएको उनले जानकारी दिए । यसमध्ये करिब दुई लाखभन्दा बढी बिरुवा सुन्तलाका रहेका छन् । कृषि विकास कार्यालय र स्थानीय तहहरूको समन्वयमा नर्सरी व्यवसायलाई प्राथमिकता दिँदै आएको घर्तीले बताए ।
‘प्लास्टिक टनेल निर्माण, सिँचाइ पोखरी निर्माणलगायत सहयोग गरेका छौँ,’ सूचना अधिकारी घर्तीले भने । उत्पादनभन्दा माग बढी हुँदा कम गुणस्तरीय बिरुवा पनि बेच्न सक्ने अवस्थालाई ध्यान दिँदै सजग रहन आग्रह गरिएको उनले बताए ।
बंगुर पालेर आठ लाख कमाइ
सल्यानको त्रिवेणी गाउँपालिका– ३, लोलाउनेकी सावित्रा महतराले बंगुर पालेर वार्षिक सरदर आठ लाख रुपैयाँ आम्दानी गरिरहेकी छिन् ।
सुरुवातमा थोरै संख्याबाट बंगुरपालन थालेकी उनले ०७४ बाट ‘महतरा कृषि तथा पशुपक्षी फार्म’ दर्ता गरेर व्यावसायिक बंगुरपालन गरिरहेकी छिन् । ‘फार्ममा अहिले साना–ठुला गरी ५० वटा बंगुर पालिरहेकी छु,’ उनले भनिन्, ‘वैशाख र जेठमा मात्रै तीन लाखको बंगुर बिक्री भइसकेको छ । यो वर्ष पहिलेको भन्दा बढी आम्दानी हुने देखेकी छु ।’
उनले गत वर्ष बंगुर बेचेर आठ लाखभन्दा बढी आम्दानी गरेकी थिइन् । मासुका लागि ठुला बंगुरभन्दा साना पाठापाठीको माग बढी हुने गरेको महतराले बताइन् । उनले एकजोडी बंगुरका पाठापाठी ४५ सय रुपैयाँसम्ममा बिक्री गर्ने गरेको जानकारी दिइन् । उनले बंगुरलाई स्थानीय गाउँघरमा पाइने खाद्यान्न तथा बारी र जंगलमा खेर गइरहेको सिस्नो खुवाउने गरेकी छिन् ।
