चुरे जंगलको नजिक पर्ने सिराहाको गोलबजार नगरपालिका मुसहर्निया पुराण्डिह गाउँमा आपसी विवादको क्रममा आफ्नै भाइले धारिलो हतियार प्रहार गरी दाजुको हत्या गरेका छन् ।
मदिरा सेवन गरी घर फर्किएका गोलबजार- ३ मुसहर्निया पुराण्डिहका करिब २५ वर्षीय श्याम सदाले धारिलो हतियार प्रहार गर्दा बिहीबार राति सहोदर दाजु करिब ३५ वर्षीय लेलहा भनिने मोतीराम सदाको मृत्यु भएको प्रहरीले जनाएको छ ।
इलाका प्रहरी कार्यालय गोलबजारले घटनाको पुष्टि गर्दै मृतकको शव पोस्टमार्टमका लागि लहानस्थित रामकुमार उमाप्रसाद प्रादेशिक अस्पताल पठाएको छ । घटनालगत्तै फरार भएका भाइको खोजतलास जारी रहेको प्रहरीले जनाएको छ ।
बिहीबार राति करिब ७ र ८ बजेको बिचमा घटना भएको हो । झन्डै डेढ घण्टापछि आफूहरूकहाँ खबर आएलगत्तै प्रहरी परिचालन गरिएको गोलबजार प्रहरी प्रमुख प्रहरी निरीक्षक गोविन्दप्रसाद साहले जानकारी दिए । उनका अनुसार प्रहरी घटनास्थल पुग्दा स्थानीयले दाजुलाई अस्पताल पठाइसकेको र भाइसमेत फरार भइसकेका थिए ।
‘घटनास्थलमा प्रयोग गरिएको हतियार, प्रहार गर्ने व्यक्तिसमेत भेटिएन,’ उनले भने, ‘फरार रहेका भाइको खोजीका लागि प्रहरी परिचालन गरिएकाे छ ।’
गाउँबाट मदिरा सेवन गरेर घर फर्किएलगत्तै श्याम र उनकी श्रीमती कौशिल्यादेवीबिच झगडा भएपछि छुट्याउन गएका दाजु मोतीराममाथि धारिलो हतियार प्रहार भएको गोलबजार- ३ का वडाध्यक्ष धनप्रसाद मोक्तानले जानकारी दिए । मजदुरी गरेर जीविका चलाउँदै आएका मृतक दाजुकी श्रीमती गर्भवती छिन् ।
