बिबिसीले प्राप्त गरेको एक अडियो रेकर्डिङले बंगलादेशकी पूर्वप्रधानमन्त्री सेख हसिनाले गतवर्ष विरोध प्रदर्शनमाथि घातक कारबाहीको आदेश दिएको संकेत गरेको छ । गत वर्ष जुलाई र अगस्टमा भएको विशाल प्रदर्शनविरुद्ध सरकार कठोर रूपमा प्रस्तुत हुँदा एक हजार चार सय मानिस मारिएका थिए ।
पछि सेनाले हसिनाको साथ छाडेपछि ७७ वर्षीया हसिना सत्ता छाडेर छिमेकी भारत पलायन भएकी थिइन् । हसिनाको अनुपस्थितिमा गत जुन १ मा ढाकामा उनीविरुद्ध मानवताविरोधी काम गरेको अपराधको मुद्दा सुरु भएको छ ।
बिबिसीले अनुसन्धान टोलीमार्फत हसिनाको भनिएको अडियोको विश्लेषण गरेको थियो । सन् २०२४ जुलाई १८ को उक्त रेकर्डिङमा हसिनाको भनिएको आवाजले सुरक्षा फौजलाई प्रदर्शनकारीविरुद्ध ‘घातक हतियार प्रयोग गर्न’ र ‘जहाँ भेटियो, त्यहीँ गोली हान्ने’ अधिकार दिएको सुनिन्छ ।
बिबिसीले फरेन्सिक विशेषज्ञले अडियोमा भाषण सम्पादन वा हेरफेर गरिएको कुनै प्रमाण फेला नपारेको बताएको छ । बंगलादेश प्रहरीले पनि अडियोलाई हसिनाको प्रमाणित रेकर्डिङ भएको बताएको छ । अब यो अडियो हसिनामाथि मानवताविरुद्धको मुद्दा दायर गरेका अभियोजन पक्षको मुख्य प्रमाणको आधार बनेको छ ।
