सिराहाको लहान नगरपालिका– ११ मा खैरो हेरोइनसहित प्रहरीले दुईजनालाई पक्राउ गरेको छ। पक्राउ पर्नेमा लहान–११, पडरियाका २८ वर्षीय मिथिलेश चौधरी र २४ वर्षीय राजनन्दन चौधरी रहेका जिल्ला प्रहरी कार्यालय सिराहाका प्रवक्ता डिएसपी वीरेन्द्रकुमार पासवानले बताए।
जिल्ला प्रहरी कार्यालय र इलाका प्रहरी कार्यालय लहानबाट खटिएको प्रहरीको संयुक्त टोलीले मिथिलेशको साथबाट प्लास्टिकमा प्याक गरिएको ११३.९१ ग्राम खैरो हेरोइन (प्लास्टिकबाहेक १०९ ग्राम), ७३१० रुपैयाँ र मोबाइल एक थान तथा घरको दराजबाट थप दुई लाख ७५ हजार तीन सय नेपाली रुपैयाँ र भारु एक हजार २५० रुपैयाँ, सुनको तिलहरी एक थान, नेकलेस एक थान, डिजिटल तराजु एक थान र प्लास्टिक काट्ने कैँची एक थान बरामद गरिएको डिएसपी पासवानले बताए।
यस्तै, सोही ठाउँ बस्ने नन्दनको साथबाट खैरो हेरोइन प्लास्टिकसहित १०.७१ ग्राम (प्लास्टिकबाहेक ९.६१ ग्राम), नगद दुई हजार एक सय र मोबाइल एक थान बरामद गरिएको प्रहरी प्रवक्ता डिएसपी पासवानले बताए।
पक्राउ गरिएका दुवैजनालाई लागुऔषधअन्तर्गतको कसुरमा जिल्ला अदालत सिराहाबाट पाँच दिनको म्याद थप गरी अनुसन्धान भइरहेको प्रहरीले जनाएको छ।
