मनहरीमा बसको ठक्करबाट युवाको मृत्यु भएपछि राजमार्ग अवरुद्ध

मकवानपुरको मनहरीमा रात्रिबसको ठक्करबाट एकजना युवाको मृत्यु भएपछि स्थानीयले पूर्व–पश्चिम राजमार्ग अवरुद्ध गरेका छन्। पूर्व–पश्चिम राजमार्गअन्तर्गत  मकवानपुरको मनहरी गाउँपालिका– ६ लोथरस्थित प्रहरी चौकीअगाडि प्रदर्शन गर्दै स्थानीयले राजमार्ग अवरुद्ध गरेका हुन्।

गएराति करिब ३ बजेको समयमा यात्रुबसले म्याजिकलाई ठक्कर दिँदा म्याजिकचालक राक्सिराङ गाउँपालिका– ४ का ३२ वर्षीय सन्देश कोइरालाको मृत्यु भएको थियो । चितवनबाट हेटौँडातर्फ आउँदै गरेको बा.प्र.०३–००६ ख ५६८१ नम्बरको बस र मनहरीबाट चितवनतर्फ जाँदै गरेको बा.प्र.०३–००१ च ३०१२ नम्बरको  म्याजिक गाडी एक–आपसमा ठक्कर खाई दुर्घटना भएको थियो।

म्याजिकमा चालकबाहेक अन्य कुनै यात्रु नरहेको प्रहरीले जनाएको छ ।  दुर्घटनामा म्याजिक चालक कोइरालाको खुट्टा, टाउको र शरीरमा चोट लागी गम्भीर घाइते भई उपचारका लागि चितवन नयाँ मेडिकल कलेज भरतपुर पठाइएकोमा डाक्टरले मृत घोषणा गरेका थिए।

मृतकको शव सोही अस्पतालमा रहेको र बसचालक नियन्त्रणमा रहेको जिल्ला प्रहरी कार्यालय मकवानपुरले जनाएको छ । स्थानीयले चालकलाई कारबाही गर्नुपर्ने माग गर्दै राजमार्ग बन्द गरेका हुन्।