जन्ममिति ‘किर्ते’ गरेका बिमा प्राधिकरणका पूर्वअध्यक्ष सिलवाललाई विशेष अदालतबाट सफाइ

पदावधि लम्ब्याएको अभियोगमा तीन महिनाअघि मुद्दा चलाइएका नेपाल बिमा प्राधिकरणका पूर्वअध्यक्ष सूर्यप्रसाद सिलवाललाई विशेष अदालतले भ्रष्टाचार मुद्दामा सफाइ दिएको छ । विशेषका सदस्यहरू तेजनारायणसिंह राई, रामबहादुर थापा र मुरारीबाबु श्रेष्ठको इजलासले सिलवाललाई सफाइ दिने फैसला गरेको हो । विशेषले सफाइ दिँदा सिइआइबी र अख्तियारले भने उनीमाथि जन्ममिति किर्ते र गैरकानुनी सम्पत्ति आर्जनको मुद्दामा अनुसन्धान गरिरहेका छन् ।

सिआइबीले जन्ममिति किर्ते मुद्दामा पक्राउ गर्न अदालतबाट अनुमति लिइसकेको छ । त्यस्तै, अख्तियारले गैरकानुनी सम्पत्ति आर्जन गरेको मुद्दामा अनुसन्धान गरिरहेको छ । सिलवालको विभिन्न कागजातमा तीनथरी जन्ममिति रहेको घटनामा अख्तियारले ‘नपाएको ओहोदा पाएँ’ भनी भ्रष्टाचार गरेको अभियोगमा २४ मंसिरमा मुद्दा दर्ता गराएको थियो । अख्तियारको अनुसन्धानअनुसार उनले जिल्ला प्रशासन कार्यालय पर्साबाट नागरिकता लिँदा २४ फागुन ०३२ मा १६ वर्षको रहेको उल्लेख छ । पछि जिल्ला प्रशासन कार्यालय काठमाडौंबाट प्रतिलिपि लिँदा भने जन्ममिति ०१६ को २२ कात्तिकको छ । त्रिभुवन विश्वविद्यालयबाट जारी भएको डिप्लोमा तहको ट्रन्सक्रिप्टमा उनको जन्ममिति १५ साउन ०१५ छ । 

निजामती सेवामा आएपछि सिलवालले १५ साउन ०१५ जन्ममितिअनुसार नियुक्ति र निवृत्तिभरण प्राप्त गरेका थिए । यद्यपि, पदमै बहाल रहेका बखत उनले लिएको कूटनीतिक र विशेष राहदानीका लागि भने २४ कात्तिक ०१८ जन्ममिति उल्लेख गरेका थिए । यसरी झन्डै तीन वर्ष उमेर घटाएर झुटा विवरण पेस गरी राहदानी प्रयोग गरेको अभियोग उनीमाथि थियो । अख्तियारले ३६ लाख ६२ हजार रुपैयाँभन्दा बढी बिगो र कैद सजायसमेत मागदाबी गर्दै मुद्दा दायर गरेकोमा विशेषले सफाइ दिएको हो । फैसलाको पूर्णपाठ सार्वजनिक भएको छैन । फैसलाप्रति अख्तियार दुरुपयोग अनुसन्धान आयोगका अधिकारीले असन्तुष्टि जनाएका छन् । 

निजामती सेवाको नियुक्ति लिँदा पेस गरेको जन्ममितिको आधारमा निजामती किताबखानाबाट सिलवालले निवृत्तिभरण अधिकारपत्र प्राप्त गरेका थिए । ५८ वर्षे सेवा अवधिका आधारमा उनले १५ साउन ०७३ मा अनिवार्य अवकाश प्राप्त गरेका थिए । तर, सिलवालले निजामती सेवामा नियुक्ति हुँदा एक जन्ममिति राखेर सेवामै रहँदाको अवस्थामा राहदानी बनाउँदा फरक जन्ममिति उल्लेख गरेका थिए । निजामती सेवामा बहाल रहेको अवस्थामा सिलवालले कूटनीतिक राहदानी र विशेष राहदानी पाउन भरेको ‘पासपोर्ट एप्लिकेसन फर्म’मा उमेरको झुटा विवरण अर्थात् २४ कात्तिक ०१८ कायम गरेको अभियोग थियो । 

‘निज प्रतिवादीले आफ्नो वास्तविक जन्ममितिभन्दा करिब तीन वर्ष उमेर घटाएर राष्ट्रसेवकको हैसियतले प्राप्त हुने कूटनीतिक राहदानी र विशेष राहदानी प्राप्त गर्न झुटा विवरण पेस गरी, प्राप्त गरी÷गराई राष्ट्रसेवकका रूपमा उक्त राहदानी प्रयोगमा ल्याई लाभ, सुविधा प्राप्त गरेको देखियो,’ अख्तियारको आरोपपत्रमा उल्लेख थियो । पूर्वगृहसचिवसमेत रहेका सिलवाल मुद्दा दायर हुँदा प्राधिकरणको अध्यक्ष पदमै थिए । उनको चार वर्षको पदावधि गत १९ माघमै समाप्त भइसकेको छ । अवकाशअघि सिलवाल केही व्यापारिक घरानालाई लाइसेन्स बाँड्ने तयारीमा थिए । हाल सरकारले शरद ओझालाई प्राधिकरणको अध्यक्ष नियुक्त गरेको छ । 

जन्ममिति किर्तेमा सिआइबीको पक्राउ पुर्जी, अख्तियारले अकुत सम्पत्तिमा गर्दै छ छानबिन 
जन्ममिति किर्ते गरेको अभियोगमा सिलवालमाथि प्रहरीको केन्द्रीय अनुसन्धान ब्युरो (सिआइबी)ले पनि अनुसन्धान गरिरहेको छ । स्रोतका अनुसार सिआइबीले किर्ते मुद्दामा उनलाई पक्राउ गर्न अदालतबाट समेत अनुमति लिइसकेको छ । उनीमाथि किर्ते मुद्दामा अनुसन्धान गर्न अख्तियारले गत मंसिरमै सिआइबीलाई पत्राचार गरेको थियो । ‘अख्तियारकै पत्रका आधारमा अनुसन्धान थालेका हौँ,’ सिआइबीका एक उच्च अधिकारीले भने, ‘उनी हाम्रो फरार सूचीमा छन् ।’ 
स्रोतका अनुसार अख्तियारले गैरकानुनी सम्पत्ति आर्जनको मुद्दामा पनि उनीमाथि अनुसन्धान गरिरहेको छ । उनको सबै सम्पत्तिको विवरण निकालेर बयानमा बोलाउने तयारी गरेको छ । निजामती सेवामा रहँदा तथा पछि बिमा प्राधिकरणको अध्यक्ष हुँदा उनले अकुत सम्पत्ति आर्जन गरेको उजुरी परेका छन् ।
 यस्ता थिए अभियोग 

• पर्सा र काठमाडौंबाट जारी नागरिकता र कर्मचारी सिटरोलमा अलग–अलग जन्ममिति
• अधिकृतमा नियुक्ति लिँदा एउटा र सेवामै रहँदा बनाएको राहदानीमा अर्कै जन्ममिति उल्लेख
• कार्यकाल बढाउन कम उमेर भएको जन्ममिति पेस 
• उमेरहदले १४ महिनाअघि नै बाहिरिनुपर्नेमा पदमा बहाल हुन जन्ममिति किर्ते 

 जन्ममिति किर्तेमा सिआइबीको पक्राउ पुर्जी, अख्तियारले अकुत सम्पत्तिमा गर्दै छ छानबिन 
जन्ममिति किर्ते गरेको अभियोगमा सिलवालमाथि सिआइबीले पनि अनुसन्धान गरिरहेको छ । स्रोतका अनुसार सिआइबीले उनलाई पक्राउ गर्न अदालतबाट समेत अनुमति लिइसकेको छ । उनीमाथि किर्ते मुद्दामा अनुसन्धान गर्न अख्तियारले गत मंसिरमै सिआइबीलाई पत्राचार गरेको थियो । ‘अख्तियारकै पत्रका आधारमा अनुसन्धान थालेका हौँ,’ सिआइबीका एक उच्च अधिकारीले भने, ‘उनी हाम्रो फरार सूचीमा छन् ।’ स्रोतका अनुसार अख्तियारले गैरकानुनी सम्पत्ति आर्जनको मुद्दामा पनि उनीमाथि अनुसन्धान गरिरहेको छ । उनको सबै सम्पत्तिको विवरण निकालेर बयानमा बोलाउने तयारी गरेको छ ।