स्तरोन्नतिका लागि दैनिक १४ घण्टा मात्र सञ्चालन हुँदै आएको त्रिभुवन अन्तर्राष्ट्रिय विमानस्थल शनिबारदेखि १६ घण्टा सञ्चालनमा आउने भएको छ । धावनमार्गबाट ७५ मिटरभित्र पर्ने संरचना निर्माण कार्य सकिएकाले विमानस्थल सञ्चालन अवधि बढाइएको नागरिक उड्डयन प्राधिकरणले जनाएको छ ।
‘शनिबारदेखि आठ घण्टा (राति ११ बजेदेखि बिहान ७ बजेसम्म) मात्र बन्द गरेर स्तरोन्नतिको काम गरिनेछ’ प्राधिकरणका सहप्रवक्ता ज्ञानेन्द्र भुलले भने । २३ कात्तिकदेखि दैनिक १० घण्टा (राति १० बजेदेखि बिहान ८ बजेसम्म) विमानस्थल बन्द गरेरै स्तरोन्नतिको काम हुँदै आएकोमा अहिले सञ्चालन अवधि बढाइएको हो ।
प्राधिकरणका अनुसार विमानस्थलमा ट्याक्सी वे, राष्ट्रिय तथा अन्तर्राष्ट्रिय जहाज पार्किङस्थल, ह्यांगरलगायतका पूर्वाधार निर्माण भइरहेको छ । स्तरोन्नतिका कारण त्रिभुवन विमानस्थलबाट राति १० बजेदेखि बिहान ८ बजेसम्म हुने उडानहरू अगाडि–पछाडि सारिएको छ भने ३३ प्रतिशत उडान कटौती गरेर भैरहवा डाइभर्ट गरिएको छ ।
धावनमार्गबाट ७५ मिटरभित्र पर्ने संरचनाको काम भने आगामी १८ चैतभित्र सक्ने लक्ष्य राखिएको छ । हालसम्म करिब ४० प्रतिशत काम सकिएको प्राधिकरणले जनाएको छ ।
विमानस्थलको पूर्वतर्फ सेना, वायुसेवा निगम, यती एयरलाइन्स, सौर्य एयरलाइन्सलगायतका लागि ह्यांगर निर्माण भइरहेको छ । पहिलो चरणको काम सकिएपछि वार्षिक एक करोड यात्रुलाई सेवा दिने पूर्वाधार तयार हुने विमानस्थलमा क्षमता अभिवृद्धि परियोजनाले जनाएको छ ।
उडान थप्न वायुसेवा कम्पनीको माग
विमानस्थलमा दुई घण्टा उडान अवधि थपिएपछि करिब १५ प्रतिशत उडान थपिने प्राधिकरणका सहायक प्रवक्ता ज्ञानेन्द्र भुलले बताए । ‘बिहानको एक घण्टा आन्तरिक र बेलुकाको एक घण्टा अन्तर्राष्ट्रिय वायुसेवाका लागि खुला गरेको जस्तै भएको छ,’ उनले भने, ‘दुई घण्टा अवधि थपिँदा आन्तरिक ५ प्रतिशत र अन्तर्राष्ट्रिय १० प्रतिशत हाराहारी उडान थपिने अनुमान गरिएको छ ।’
विमानस्थल १४ घण्टा मात्र सञ्चालन हुँदा दैनिक औसतमा २२० आन्तरिक उडान–अवतरण र ७८ वटा अन्तर्राष्ट्रिय उडान–अवतरण हुँदै आइरहेको छ । अब दुई घण्टा उडान अवधि थपिँदा आन्तरिक उडान २९० र अन्तर्राष्ट्रिय उडान करिब सयको संख्यामा पुग्ने सहप्रवक्ता भुलले जानकारी दिए । दुई घण्टा अवधि थपिएपछि वायुसेवा कम्पनीहरूले पनि उडान रि–सेड्युल गर्दै छन् । अगाडि र पछाडि धकेलिएका उडानहरू पहिलेकै समयमा सार्न प्राधिकरणलाई आग्रह गरेका छन् । ‘वायुसेवा कम्पनीहरूले उडान माग गरेपछि हामीले अनुमति दिने हो, उनीहरूले रि–सेड्युल गर्दै छन्, अब उडानहरू थपिँदै जान्छन्,’ भुलले भने ।
विमानस्थल विस्तारमा ४०% प्रगति भएको छ : ज्ञानेन्द्र भुल, सहायक प्रवक्ता, नागरिक उड्डयन प्राधिकरण
२३ कात्तिकदेखि दैनिक १० घण्टा विमानस्थल बन्द गरेरै स्तरोन्नतिको काम हुँदै आएकोमा शनिबारदेखि आठ घण्टा (राति ११ बजेदेखि बिहान ७ बजेसम्म) मात्र बन्द गरेर स्तरोन्नतिको काम गरिनेछ । स्तरोन्नतिका कारण केही उडान अगाडि–पछाडि सारिएको छ भने ३३ प्रतिशत कटौती गरेर भैरहवा डाइभर्ट गरिएको छ ।
