भारतको महाराष्ट्रस्थित जलगाउँमा बुधबार साँझ रेलमा आगलागीको हल्ला भएपछिको भागदौडमा एकजना बालकसहित चार नेपालीको पनि मृत्यु भएको छ । घटनामा १३ जनाको मृत्यु भएको छ । चार नेपाली घाइते पनि छन् ।
भारतको उत्तरप्रदेशस्थित लखनउबाट मुम्बईतर्फ गएको पुष्पक एक्सप्रेस रेलमा आगलागी भएको हल्ला चलेपछि यात्रुहरू भाग्ने क्रममा विपरीत दिशातर्फबाट आएको कर्नाटक एक्सप्रेसमा ठोक्किएको भारतीय सञ्चारमाध्यमले जनाएका छन् । घटनामा कुल १३ जनाको मृत्यु पुष्टि भएको छ ।
मृतक चारजना नेपालीको सनाखत भएको नेपाली राजदूतावासले बिहीबार पुष्टि गरेको छ । नेपाली राजदूतावासका काउन्सिलर सञ्जीव शर्मा दासका अनुसार नेपाली नागरिकहरू ४३ वर्षीया कमला भण्डारी, ४० वर्षीय लक्षीराम खत्रु पासी, ११ वर्षीय नन्दुराम विश्वकर्मा र ६० वर्षीया जाभाकला भाटको मृत्यु भएको छ । विश्वकर्मा कोशी प्रदेशका र भाट अछामकी रहेको पुष्टि भएको छ ।
‘परिवार घटनास्थलमा पुगिसकेको भन्ने जानकारी आएको छ । भारतीय प्रहरीले नजिकको सीमासम्म शव लैजाने व्यवस्था गर्ने जानकारी दिएको छ,’ काउन्सिलर दासले टेलिफोनमा नयाँ पत्रिकासँग भने ।
घटनामा घाइते भएकाहरूमा अछाम मंगलसेनका ३८ वर्षीय ह्युजला सावन्त र ८ वर्षीय धर्मबहादुर सावन्त छन् । यसैगरी, दैलेख दुल्लुका मञ्जु परियार र दुल्लुकै १८ वर्षीय दीपक थापा पनि घाइते भएका छन् । उनीहरूको उपचार भइरहेको छ । घटनास्थल महाराष्ट्र प्रान्तको राजधानी मुम्बईबाट चार सय किलोमिटरको दूरीमा छ ।
