नेपाल प्रिमियर लिगको १२ औं खेलमा सुदुरपश्चिम रोयल्सले लुम्बिनी लायन्सलाई १८८ रनको लक्ष्य दिएको हो । २० ओभरमा चार विकेट गुमाउँदै सुदुरपश्चिमले १८७ रन बनाएको हो।
लुम्बिनीले टस जितेर पहिले फिल्डिङ गरेको थियो । सुरुका दुई खेल हारेको लुम्बिनी पहिलो जितको लक्ष्यमा छ भने सुदुरपश्चिम तेस्रो जितको प्रयासमा छ।
इंग्ल्यान्डका २६ वर्षीय सैफ जैबको अर्धसतकप्रेरित सुदूरपश्चिम रोयल्सले उच्च स्कोर बनाएको हो ।
बायाँ हाते ब्याटिङ् अलराउन्डर जैबले ६१ बलमा ६ चौका र ५ छक्कासहित सर्वाधिक ९० रन बनाए । उनी प्रतियोगितामा ९० रन बनाउने तेस्रो खेलाडी बनेका छन् । यसअघि रोहितकुमार पौडेल र आन्द्रेस गौसले ९० रन कटाएका थिए । अमेरिकाबाट खेल्दै आएका गौसले भने सतक नै बनाए । जैबले यसअघि विराटनगरविरुद्ध १४ तथा काठमाडौंविरुद्ध ११ रन मात्रै बनाएका थिए ।
कप्तान दीपेन्द्रले १९ बलमा चार चौका र २ छक्कासहित अविजित ३९ रन बनाए । दीपेन्द्र र जैवबीच तेस्रो विकेटको लागि ५३ रनको साझेदारी भएपछि सुदूरपश्चिमले विहानी खेलमै ठूलो स्कोर बनाएको थियो ।
अर्का ओपनर विनोद भण्डारी १७ रन बनाएर आउट भएका थिए । जैव र विनोदबीच पहिलो विकेटको लागि ४९ रनको साझेदारी भएको थियो । तेस्रो नम्बर क्रिजमा आएका ब्रान्डन म्याकमुलेनले २३ रनको योगदान गरे । आरिफ शेख गोल्डेन डक आउट भए । स्कट कुगेलेइनले ६ बलमा एक छक्कासहित अविजित ११ रन बनाएका हुन् ।
बलिङतर्फ लुम्बिनीका रमोन सिमन्ड्ले चार ओभरमा ३२ रन दिएर दुई विकेट लिएका थिए। रोहित पौडेल र विवेक यादबले पनि १/१ विकेट लिएका छन्। रोहितले किफायती बलिङ गर्दै चार ओभरमा २२ रन मात्र दिएका थिए।
