मकवानपुर जिल्ला लिगः सतप्रतिशत जितसहित डाँफे शीर्ष स्थानमा

हेटौँडामा जारी मकवानपुर जिल्ला लिग फुटबल प्रतियोगितामा साविक विजेता न्यू डाँफे क्लवले यस वर्ष पनि उत्कृष्ट खेल प्रस्तुत गरिरहेको छ ।

४ वटा खेल खेलेको डाँफेले सतप्रतिशत जितसहित १२ अंक जोडेको छ । समूह ख मा रहेको डाँफेसहित गोर्खा ब्वाइजले पनि ४ वटै खेल जितिसकेको छ ।

निरन्तर जित निकाल्ने क्रममा डाँफेले मंगलबार पिप्ले युवा क्लवलाई ३–२ गोलले हरायो। डाँफेका लागि सुसान्त तामाङ, किसन थापा मगर र राजिव डिम्डुङले गोल गरे । पहिलो हाफमै २ गोलले पछि परेको पिप्लेले दोस्रो हाफमा सुधारिएको खेल प्रस्तुत गर्दै खेललाई बराबरीमा ल्याएको थियो ।

दोस्रो हाफको सुरुवातमै प्रविण श्रेष्ठ र सम्पूर्ण नगरकोटीले पिप्लेका लागि गोल गरेका थिए । तर, ७० औं मिनेटमा डाँफेका लागि राजिव डिम्डुङले निर्णायक गोल गरे । खेलको म्यान अफ द म्याच डाँफेका किसन थापा मगर घोषित भए ।

१८ गोल गरेको डाँफेले हालसम्म ३ गोल मात्र व्यहोरेको छ । उद्घाटन खेलमा महाबीर क्लवसँग ७–० जित निकाल्दै आक्रमक सुरुवात गरेको डाँफेले दास्रो खेलमा हटौंडा फुटबल एकेडेमीलाई ३–० ले र तेस्रो खेलमा इन्टरनेट सिटीलाई ५–१ ले हराएको थियो ।

मंगलबारै भएको खेलमा एफसी मल्टिभिजनले हटिया स्पोर्टस् एकेडेमीलाई ४–० ले हराएको छ । मल्टिभिजनले पनि निरन्तर तीन खेलमा जित निकाल्दै ९ अंक जोडिसकेको छ । मल्टिभिजनले पहिलो हाफमा २ र दोस्रो हाफमा २ गोल गरेको हो । मल्टिभिजनका लागि जेनिस थपलियाले ह्याट्रिक गर्दा सुमन लो लामाले एक गोल गरेका हुन् ।

सिमलटार खेल मैदानमा भएको खेलमा न्यू कम्बाइन क्लव र एफसी नामटार विजयी भएको छ । कम्बाइनले सानोपोखरा क्लवलाई १–० ले हराएको हो । कम्बाइनका निशान न्यासुरले गरेको गोल नै निर्णायक बन्यो । खेलको म्यान अफ द म्याच कम्बाइनका सुरज थिङ घोषित भए ।

अर्को खेलमा एफसी नामटारले हेटौंडाको ७ नम्बर फुटबल टिमलाई १–० ले हराएको हो । नामटारका लागि सविन गोलेले निर्णायक गोल गरे । गोले नै खेलको म्यान अफ द म्याच घोषित भएका छन् । जारी प्रतियोगितामा बुधबार पनि ४ खेल हुनेछ ।

जिल्ला लिगको विजेताले एकलाख र उपविजेताले ५० हजार रुपैयाँसहित ट्रफी र प्रमाणपत्र प्राप्त गर्नेछ । लिगमा सहभागी २८ क्लवलाई ४ समूहमा विभाजन गरी अहिले लिग चरणको खेल सञ्चालन गरिरहेको छ ।