अधिकांश मुसलमान मतदाताले इजरायललाई सैन्य सहायता घटाउनुपर्ने नीतिमा समर्थन गर्दै उम्मेदवारको ऐक्यबद्धता खोजिरहेका छन्
अमेरिकी राष्ट्रपतीय निर्वाचन नजिकिँदै गर्दा डेमोक्य्राट र रिपब्लिकन दुवै मुसलमान समुदायमा केन्द्रित भएका छन् । मुसलमान समुदायले जनसंख्याको करिब एक प्रतिशत हिस्सा ओगट्ने भए पनि उनीहरू अस्थिर मतदान हुने राज्यका एक प्रमुख मतदाता समूह हुन् । तसर्थ, अत्यधिक प्रतिस्पर्धात्मक चुनाव हुने क्षेत्रमा मुसलमान मतदाताको भूमिका महत्वपूर्ण हुने गर्छ ।
हालको चुनावी अभियानका क्रममा मुसलमान समुदाय गाजा द्वन्द्वको मुद्दामा एकजुट भएका छन् । ‘इंगेज एन्ड चेन्ज रिसर्च’सँगको सहकार्यमा ‘इन्स्टिट्युट फर सोसल पोलिसी एन्ड अन्डरस्ट्यान्डिङ’ (आइएसपियू) द्वारा गरिएको नयाँ अध्ययनले मुसलमान मतदाताको मत पाउन प्यालेस्टाइनमा रक्तपात अन्त्य गर्नुपर्ने आह्वानलाई सम्बोधन गर्नैपर्ने जनाएको छ । जुनको अन्त्य र जुलाईको सुरुमा गरिएको सर्वेक्षण जर्जिया, पेन्सिलभेनिया र मिसिगन राज्यमा मुसलमान मतदाताको उद्देश्यमा केन्द्रित थियो । अनुसन्धानले राष्ट्रपति जो बाइडेनले गाजा द्वन्द्वलाई लिएर गरेको कामका कारण सन् ०२० मा उनका प्रमुख समर्थक रहेका मुसलमान समुदाय कडा आलोचक बनेको देखाएका छन् । त्यसवेला अस्थिर मतदान हुने प्रमुख राज्यमा करिब ६५ प्रतिशत मुसलमान मतदाताले बाइडेनलाई समर्थन गरेकाले उनले सानो अन्तरले चुनाव जितेका थिए । जर्जियामा उनले केवल १२ हजार मतले जितेका थिए, त्यहाँ ६१ हजारभन्दा बढी मुसलमान मतदाताले मतदान गरेका थिए । त्यसैगरी, पेन्सिल्भेनियामा जितको अन्तर ८१ हजार थियो, त्यहाँ एक लाख २५ हजार मुसलमानले मतदान गरेका थिए ।
हाम्रो सर्वेक्षणमा (सर्वेक्षण हुँदा बाइडेन चुनावी प्रतिस्पर्धाबाट बाहिरिसकेका थिएनन्) केवल १२ प्रतिशत मुसलमान उत्तरदाताले मात्रै बाइडेनलाई मतदान गर्ने बताएका थिए, जुन अन्य समूहका तुलनामा तीव्र गिरावट हो । यसले राष्ट्रपतीय प्रतिस्पर्धालाई मात्र नभई समग्र डेमोक्रेटिक पार्टीसँगको व्यापक निराशालाई पनि झल्काउँछ । गाजा द्वन्द्वले मुसलमान मतदातालाई हालैका अन्य मुद्दाभन्दा बढी एकताबद्ध गरेको छ । आइएसपियूद्वारा सन् २०२० मा गरेको सर्वेक्षणमा मुसलमान मतदाताका लागि प्रमुख मुद्दा स्वास्थ्य सेवा (१९ प्रतिशत), अर्थ व्यवस्था (१४ प्रतिशत) र सामाजिक न्याय (१३ प्रतिशत) थिए ।
सन् २०२४ मा जर्जिया, पेन्सिलभेनिया र मिसिगनका ६१ प्रतिशत मुसलमान मतदाताले गाजा द्वन्द्वमा चासो देखाए भने २२ प्रतिशत उत्तरदाताले अमेरिकाले विदेशी युद्धबाट हात झिक्नुपर्ने बताए । अधिकांशले मुसलमान उत्तरदाता इजरायललाई सैन्य सहायता घटाउनुपर्ने नीतिमा समर्थन गर्छन् र यसलाई समुदायले मतदानका लागि महत्वपूर्ण ठान्छन् ।
हाम्रो सर्वेक्षणभन्दा महिनौँअघि गाजा द्वन्द्वमा मुसलमान समुदायको चासो अप्रतिबद्ध राष्ट्रिय अभियानमा उनीहरूको भूमिकामार्फत स्पष्ट थियो । यसले सात लाखभन्दा बढी डेमोक्य्राटलाई राष्ट्रपतीय चुनावको प्राइमरीमा ‘अप्रतिबद्ध’ मतदान गरायो, जहाँ बाइडेनको इजरायल–प्यालेस्टाइन नीतिमा परिवर्तनको माग गरिएको थियो । बाइडेनका पूर्वमुसलमान समर्थक बढ्दो रूपमा तेस्रो पक्षतिर गइरहेका वा अनिर्णीत छन् । हाम्रो अध्ययनले आमजनताको ६ प्रतिशतको तुलनामा २७ प्रतिशतले तेस्रो पक्षको उम्मेदवारलाई मतदान गर्ने योजना बनाएका छन्, तीन प्रतिशतले उम्मेदवार हेरेर मतदान गर्ने र १७ प्रतिशत अझै पनि अनिर्णीत भएको पत्ता लगाएको छ । यसले उम्मेदवारलाई मुसलमान समुदायको महत्वपूर्ण समूहसँग संलग्न हुने अवसर निर्माण गर्छ र उम्मेदवार त्यसो गर्न प्रयास गरिरहेका पनि देखिन्छन् ।
बाइडेन चुनावी दौडबाट बाहिर मात्र भएका छैनन्, कमला ह्यारिसले इजरायलको गाजा नीतिका लागि आफ्नो बलियो समर्थनलाई घटाएकी छिन् । उनी कांग्रेसमा भएको नेतन्याहुको सम्बोधनमा सहभागी भइनन्, युद्धविरामका लागि समर्थन व्यक्त गरिन् र प्यालेस्टिनीप्रति बढी सहानुभूति राख्ने मिनेसोटाका गभर्नर टिम वाल्जलाई उपराष्ट्रपतिका लागि छनोट गरिन् । वाल्जले गाजा मानवीय संकटबारे मतदाताका चिन्ता र चासोलाई स्वीकार गर्दै अप्रतिबद्ध मतदाताको प्रशंसा पनि गरेका छन् ।
ह्यारिसको चुनावी अभियानले प्यालेस्टिनी–अमेरिकी वक्तालाई डेमोक्य्राटिक राष्ट्रिय अधिवेशनमा प्रतिबन्ध लगाएपछि मुसलमानका आशामा तुसारापात भएको छ । यसको ठिकविपरीत तेस्रो–पक्षका उम्मेदवार जिल स्टेन र कर्नेल वेस्टले सक्रिय रूपमा गाजालाई समर्थन गरेका छन् । वेस्टले उपराष्ट्रपतिका लागि अश्वेत मुस्लिम कार्यकर्ता मेलिना अब्दुल्लालाई छानेका छन् भने स्टेनले मुसलमान कार्यकर्ता रुडोल्फ ‘बुच’ वेयरलाई रोजेका छन् ।
विगतको मुस्लिमविरोधी बयानका बाबजुद डोनाल्ड ट्रम्पको अभियान अब अरब अमेरिकी मतदाताप्रति लक्षित देखिन्छ । जर्जिया, मिसिगन र पेन्सिलभेनियामा ट्रम्पका लागि मुसलमान समर्थन सन् ०२० मा १८ प्रतिशतबाट ०२४ मा २२ प्रतिशतमा पुगेको छ । ट्रम्पकी कान्छी छोरी टिफानीका श्रीमान् र ज्वाइँ मसाद बुलुस लेबनानी अमेरिकी व्यापारी हुन् । टिफानी वर्तमान सरकारको गाजा नीतिको आलोचना गर्दै मिसिगनका अरब मतदातालाई ट्रम्पलाई समर्थन गर्न सक्रिय रूपमा प्रोत्साहित गर्दै छिन् । प्यालेस्टाइनप्रति मुसलमान समुदायको सहानुभूतिका कारण उब्जेका पूर्वाग्रहका घटनामा वृद्धि भएको छ । अमेरिकी–इस्लामिक सम्बन्ध परिषद्ले सन् ०२३ मा इस्लामद्वेषमा ५६ प्रतिशतले वृद्धि भएको जनाएको छ । प्यालेस्टाइनविरोधी नश्लभेद पनि बढेको छ । यसलाई भर्मन्टमा तीन प्यालेस्टिनी विद्यार्थीलाई गोली हानिएको घटनाले पुष्टि गर्छ । यसबाहेक हजारौँ मुसलमान विद्यार्थीले अमेरिकी कलेजमा प्यालेस्टिनी समर्थन सक्रियताका लागि गिरफ्तार वा निष्कासनको धम्कीको सामना गरिरहेका छन् ।
प्यालेस्टाइन मामिलामा सार्वजनिक अडान लिएर निम्तिएको परिणामका बाबजुद मुसलमान मतदाता आफ्ना विचारमा अडिग छन् । गाजाका लागि समर्थन मुसलमान मतदाताका शीर्ष चिन्ताको विषय बनेको छ । तसर्थ मुसलमान समुदाय एक आवश्यक समूह बनेको छ, जसलाई कुनै पनि उम्मेदवारले बेवास्ता गर्न सक्दैन ।
(मोगाहेद इन्स्टिट्युट फर सोसल पोलिसी एन्ड अन्डरस्ट्यान्डिङ (आइएसपियू)की पूर्वअनुसन्धान निर्देशक र सेलोड अनुसन्धान निर्देशक हुन्)
अल जजिराबाट
