१२ वर्ष कतारमा श्रम गरेर स्वदेश फर्केका बागलुङ नगरपालिका– ७ कालीमाटीका ४० वर्षीय ओमराज शर्माको कृषि फार्ममा अहिले तीन हजार लेयर्स जातका कुखुरा छन्। ६ हजार कुखुरा पाल्न मिल्ने फार्म बनाएका उनले तीन हजार चल्ला थप्ने तयारी गरेका छन् ।
एक करोड ५० लाखको लगानीमा ग्रिन ल्यान्ड बहुउद्देश्यीय कृषि फार्म स्थापना गरेर सञ्चालनमा ल्याइएको फार्म कालीमाटीको ४३ रोपनी जग्गामा फैलिएको छ। फार्ममा गाई र बाख्रा पनि पालिएको छ। उनले यसरी काम थालेको पाँच वर्ष भयो । सामूहिक रूपमा थालिएको फार्म पछिल्लो तीन वर्षदेखि शर्माले एक्लै सञ्चालन गर्दै आएका छन् ।
‘कुखुरापालन व्यवसाय निकै जोखिमपूर्ण हुन्छ, ६ महिनासम्म हुर्काएका कुखुराले अन्डा दिन थालेपछि आम्दानी हुन्छ, त्यो समयसम्म लगानी मात्र गर्ने हो, बजार अस्थिर छ, अन्डाको मूल्यमा उतारचढाव हुन्छ, तर हिम्मत हारिएन अहिले फार्मलाई जिल्लाकै ठूलो अन्डा उत्पादन गर्ने फार्मका रूपमा चिनाउन सफल भएको छु,’ उद्यमी शर्माले भने। उनकाे फार्ममा प्रत्यक्ष रूपमा चारजनाले रोजगारी पाएका छन्। अहिले दैनिक तीन हजार अन्डा बागलुङमा खपत भइरहेको छ।
तीन हजार कुखुरा हुर्काएर अन्डा दिने बनाउन २५ लाख रुपैयाँ लाग्ने बताउँदै उद्यमी शर्माले व्यावसायिक रूपमा गाई र बाख्रा पाल्ने योजना सुनाए ।
