नेपाली राष्ट्रिय पुरुष कबड्डी टोलीले बंगलादेशमा आयोजना हुने चौथो बंगबन्धु कपमा प्रतिस्पर्धा गर्दै छ । २६ मेदेखि ३ जुनसम्म हुने अन्तर्राष्ट्रिय प्रतियोगितामा १२ राष्ट्रको सहभागिता रहने अखिल नेपाल कबड्डी संघका महासचिव अरबिन्दकुमार झाले जानकारी दिएका छन् । घनश्याम रोकामगरको कप्तानीमा नेपाली टोलीले प्रतिस्पर्धा गर्ने झाले बताए । टोलीमा गणेश कार्की, मनोज भट्ट कपाडी, जितेन्द्र अवस्थी, सागर यादव, इसरात मियाँ, कमलेश लोनिया, प्रकाश गिरी, खगेन्द्र जोशी, सुशील चुनारा, रोहन श्रेष्ठ र विशाल थापा छन् ।
चौथो बंगबन्धु कपमा सहभागी टोलीलाई दुई समूहमा विभाजन गरी लिग कम नकआउटका आधारमा खेल खेलाइनेछ । नेपाल रहेको समूह ‘ए’मा आयोजक बंगलादेश, श्रीलंका, इराक, मलेसिया र इन्डोनेसिया छन् । समूह ‘बी’मा थाइल्यान्ड, जापान, पाकिस्तान, दक्षिण कोरिया, केन्या र पोल्यान्ड छन् ।
नेपाली खेलाडीसँग भारतीय प्रो–लिगको अनुभव
नेपाली टोलीमा केही खेलाडीसँग भारतको चर्चित प्रो–लिग कबड्डी खेलेको अनुभव छ । नेपालका कप्तान घनश्याम भारतको चर्चित प्रो–लिग कबड्डी खेलिरहेका छन् । प्रो–लिगको १०औँ संस्करणमा उनले हरियाणा स्लिर्सबाट प्रतिस्पर्धा गरेका थिए । त्यसवेला उनी १३ लाख भारुमा अनुबन्ध भएका थिए । उनले पहिलो सहभागितामै चार टोलीविरुद्ध प्रतिस्पर्धा गर्ने अवसर पाए । उनले तेलगु टाइटन्स, गुजरात जाइन्ट्स, यु मुम्बा र बेंग्लरु बुल्स विरुद्ध खेलेका थिए ।
घनश्याम प्रो–लिगमा आबद्ध हुने नेपाली खेलाडीमध्ये सर्वाधिक पारिश्रमिक लिने खेलाडी हुन् । भारतीय कबड्डी प्रो–लिगमा नेपालबाट सञ्जय श्रेष्ठ र जयबहादुर बोहरा समान आठ आठ लाख भारुमा अनुबन्ध भएका थिए । यसैगरी, लालमोहर यादव र नागेश्वर चौधरीले समान १०–१० लाख भारतीय रुपैयाँ पारिश्रमिक लिएको महासचिव झाले बताए ।
बंगलादेशमा सहभागी हुने टोलीलाई बिहीबार राष्ट्रिय खेलकुद परिषद्का सदस्यसचिव टंकलाल घिसिङले बिदाइ गर्दै १९औँ एसियाली खेलकुद प्रतियोगिता (एसियाड)मा महिला टोलीलाई सहभागी गराउँदा थुप्रै प्रश्न सामना गर्नुपरेको खुलासा गरे । तर, चीनको हाङझाउमा महिला कबड्डी टोलीले नेपाललाई पहिलो पदकका रूपमा कांस्य दिलाउँदै सहभागिताको पुष्टि गरेको घिसिङले बताए ।
