‘बैंंकहरूसँग करिब १८ खर्ब तरलता छ, प्रणालीमा समस्या छैन’

आइतबार, १३ फागुन, २०८०
डिजिटल संस्करण

नेपाल बैंकर्स संघका अध्यक्ष तथा एनएमबि बैंकका प्रमुख कार्यकारी अधिकृत सुनील केसीले मुलुकको बैंक तथा वित्तीय क्षेत्र खतरामुक्त रहेको बताएका छन् । पछिल्लो समय बैंकिङ क्षेत्रबारे विभिन्न समूहले स्वार्थप्रेरित भ्रम फैलाउन थालेको भन्दै उनले यस्तो बताएका हुन् । बैंकहरूसँग सरकारी ऋणपत्रमा गरेको लगानीका साथै अनिवार्य नगद मौज्दात र वैधानिक तरलता अनुपातसमेत जोडेर १७–१८ खर्ब तरल सम्पत्ति रहेकाले   कुनै पनि बैंकमा समस्या नरहेको अध्यक्ष केसीले प्रस्ट पारेका हुन् ।

नेपाल आर्थिक पत्रकार संघ (नाफिज)ले काभ्रेको बनेपामा आयोजना गरेको कार्यक्रममा बोल्दै अध्यक्ष केसीले बैंकहरूसँग पर्याप्त तरलता रहेको र निष्क्रिय कर्जा केही बढेको भए पनि सजिलै व्यवस्थापन गर्न सकिने अवस्थामा रहेको बताएका हुन् । ‘बैंकहरूले सरकारी ऋणपत्र र बन्डहरूमा साढे १२ खर्बभन्दा बढी लगानी गरेका छन् । सिआरआर र एसएलआरमा समेत गरेर कुल १७–१८ खर्ब तरल सम्पत्ति छ,’ उनले भने, ‘पछिल्लो समय बैंकहरू डुब्ने लागेको भन्दै केही व्यक्तिको भ्रामक अभिव्यक्तिले सर्वसाधारण निक्षेपकर्ता आत्तिएका छन् । तर, बैंकहरूसँग औसतमा निक्षेपको २८ प्रतिशतभन्दा धेरै खुद तरल सम्पत्ति रहेकाले कुनै पनि बैंकमा समस्या छैन,’ उनले भने ।

कार्यक्रममा राष्ट्र बैंकका कार्यकारी निर्देशक गुणाकर भट्टले बैंकिङ क्षेत्र संवेदनशील रहेकाले कसैले पनि स्वार्थप्रेरित भई प्रणालीमाथि प्रहार गर्न नहुने बताए । ‘अर्थतन्त्रका चारवटा क्षेत्रमध्ये बैंकिङ क्षेत्र एक हो । त्यसकारण बैंकिङ क्षेत्रमा समस्या आए त्यसले सम्रग अर्थतन्त्रमा नकारात्मक प्रभाव देखिन सक्नेतर्फ सबैजना सजग हुनुपर्छ,’ उनले भने ।

बैंक तथा वित्तीय संस्था परिसंघ नेपाल (सिबिफिन)का अध्यक्षसमेत रहेका नबिल बैंकका अध्यक्ष उपेन्द्र पौड्यालले केही व्यक्ति र समूहले गरेको प्रहार निन्दनीय भएको बताए । ‘बैंकिङ क्षेत्र पारदर्शी छ । पारदर्शी रहेको बैंकिङ क्षेत्रलाई केही व्यक्ति र समूहले प्रहार गरिरहनु न्यायोचित हुँदैन,’ उनले भने, ‘दक्षिण एसियामा नेपालको बैंकिङ क्षेत्र सबल छ । वेला–वेलामा भूकम्प, नाकाबन्दी र कोभिडजस्ता समस्या आएका वेला पनि केन्द्रीय बैंकले विभिन्न सहजीकरण गरेर बैंकिङ क्षेत्र सबल अवस्थामै रहेको छ ।’ 

See More On

सुझावित समाचार