मकवानपुर फुटबल प्रतियोगिता : आहा रारा गोल्डकप विजेता आर्मी बाहिरियो

मंगलबार, २३ माघ, २०८०
डिजिटल संस्करण

मोसफलमा यस सिजनको पहिलो उपाधि जितेको त्रिभुवन आर्मी क्लब सोमबार छैटौँ सहिद स्मृति स्थानीय तह मकवानपुर फुटबल प्रतियोगिताको पहिलो खेलमै स्तब्ध भएको छ । धनकुटाको राजारानी क्लबसँग सडन डेथमा पराजित हुँदै आर्मी प्रतियोगिताबाट बाहिरिएको हो । गत शनिबार पोखरामा सम्पन्न २३औँ आहा रारा गोल्डकपको फाइनलमा थ्री स्टारलाई हराउँदै आर्मीले मोसफलमा सिजनकै पहिलो उपाधि हात पारेको थियो । आर्मीले पोखरामा खेलेजस्तो उत्कृष्ट प्रदर्शन राजारानी क्लबविरुद्ध देखाउन सकेन । 

आहा रारा गोल्डकपपछि ४८ घन्टाको ब्रेकमा आर्मीले मकवानपुर फुटबल प्रतियोगितामा सहभागिता जनाएको हो । सडन डेथमा राजारानीका गोलरक्षक दीप कार्की नायक बने । उनले आर्मीका सिद्धान्त चौधरीको पेनाल्टी रोक्दै आफ्नो टोलीलाई सेमिफाइनल पुर्याए । सडन डेथमा राजारानीका लागि प्रवेश दनुवार र उमेश कार्कीले गोल गरे । आर्मीका लागि विमल पाण्डेले मात्र गोल गर्न सके ।

त्यसअघि टाइब्रेकरमा राजारानीका विशाल घलान,  रुपेश केसी र गोलरक्षक दीपले गोल गरे । राजारानीका सुनील खड्का र अशोक खवास गोल गर्न चुकेका थिए । आर्मीका जितेन्द्र कार्की, कमल थापा र रसबहादुर मगरले टाइब्रेकरमा गोल गरे । वसन्त जिम्बा र श्रीराम चौधरी गोल गर्न असफल भए । यसअघि आर्मी र राजारानी क्लबले निर्धारित ९० मिनेटमा १–१ को बराबरी खेलेका थिए । टाइब्रेकरमा ३–३ को बराबरीपछि दुवै टोली सडन डेथमा पुगे ।

११औँ मिनेटमा आर्मीको अग्रता
हेटौँडा– ६ गौरीटारको मैदानमा आर्मीले सुरुवाती क्रममा उत्कृष्ट खेल प्रदर्शन गरेको थियो । फर्ममा रहेका खेलाडीहरूले राजारानी क्लबमाथि दबाब राखेको थियो । राजारानीले पहिलो १० मिनेटमा सम्हालिएर सकेन । खेलको ११औँ मिनेटमा आर्मीले १–० को अग्रता लियो । रसबहादुर मगरले कर्नरमा आर्मीले अग्रता दिलाएका थिए ।

पहिलो हाफमा आर्मीले एक गोलको अग्रता मात्र लिएको थियो । राजारानीले पहिलो गोल व्यहोरेपछि सम्हालिएर खेलेको थियो । राजारानीले त्यसपछि रक्षात्मक रणनीति अपनाएको थियो । मध्यान्तरपछि राजारानीले सुधारिएको प्रदर्शन गरेको थियो । खेलको अजायी मार्टिनले ८४औँ मिनेटमा राजारानीलाई १–१ को बराबरीमा पुर्याए । उनले डिबक्सभित्र सटिक हेडिङ गोल गरेका थिए । अब राजारानीले सेमिफाइनलमा एनआरटीको सामना गर्नेछ ।

सुझावित समाचार