२०औँ एनएसजेएफ पल्सर स्पोर्टस् अवार्डको विजेताहरूले बिमा कम्पनी युनाइटेड अजोड इन्स्योरेन्स प्रालिबाट सात लाख रुपैयाँबराबरको खेलकुद बिमा पोलिसी पाउने भएका छन् ।
२८ माघमा होटेल याक एन्ड यतीमा आयोजना हुने अवार्ड समारोहमा प्रदान गरिने नौमध्ये एसियन स्पोर्टस् जर्नालिस्ट अवार्डबाहेक आठ विधाका विजेतालाई युनाइटेड अजोडले एक वर्षका लागि सो पोलिसी प्रदान गर्ने भएको हो । युनाइटेड अजोड पल्सर स्पोर्टस् अवार्डको यस वर्षको इन्स्योरेन्स पार्टनरको रूपमा पनि आबद्ध भएको छ । नेपाल खेलकुद पत्रकार मञ्च (एनएसजेएफ) र युनाइटेड अजोड इन्स्योरेन्स प्रालिबीच यस सम्बन्धमा सम्झौता भएको छ ।
मञ्चका अध्यक्ष दुर्गानाथ सुवेदी र इन्स्योरेन्सका प्रमुख कार्यकारी अधिकृत श्रवण रावलले सम्झौतापत्रमा हस्ताक्षर गरेका छन् । सम्झौतापछि सिइओ रावलले नेपालमा भर्खरै सुरु भएको खेलकुद बिमा पोलिसीलाई संस्थागत गर्न यस सहकार्यले सहयोग पुग्ने बताए । मञ्चका अध्यक्ष सुवेदीले नेपालकै प्रतिष्ठित बिमा कम्पनीसँग सर्वोत्कृष्ट खेलकुद अवार्ड कार्यक्रममा जोडिन पाउँदा खेलाडीहरू थप लाभान्वित हुने जनाए ।
अवार्डअन्तर्गत ०७९ वर्षका उत्कृष्ट पुरुष, महिला र युवा तथा प्रशिक्षक विधाको मनोनयन पनि सार्वजनिक हुन बाँकी छ । त्यसबाहेक पाराएथलिट सम्मान, स्पेसल अवार्ड, लाइफटाइम एचिभमेन्ट अवार्ड र एसियन स्पोर्टस् जर्नालिस्ट विधाको घोषणा कार्यक्रमकै दिन घोषणा हुनेछ ।
