प्रधानमन्त्री पुष्पकमल दाहाल प्रचण्डले बुधबार दक्षिण कोरियाको गाङवनमा हुने चौथो शीतकालीन ओलम्पिक युथमा सहभागी हुने नेपाली टोलीको एक कार्यक्रमबीच बिदाइ गरेका छन् । प्रधानमन्त्री प्रचण्डले युथ ओलम्पिकमा सहभागी हुने खेलाडीलाई शुभकामना दिएका छन्।
यसअघि नेपाली टोलीलाई केल्मीले खेल पोसाकको प्रायोजन गरेको थियो । केल्मीको आधिकारिक विक्रेता कामरु ट्रेडिङका कार्यकारी निर्देशक उत्तम न्यौपानेले नेपाल ओलम्पिक कमिटीका अध्यक्ष जीवनराम श्रेष्ठलाई खेल पोसाक हस्तान्तरण गरेका छन् । शीतकालीन युथ ओलम्पिकमा नेपालको यो तेस्रो सहभागिता हो । नेपालले यू–१९ स्तरमा प्रतिस्पर्धा गर्नेछ।
यसपल्टको प्रतियोगिता १९ जनवरीदेखि १ फेब्रुअरीसम्म आयोजना हुनेछ । नेपालबाट पुरुषमा छोवाङ मिन्गुर तामाङ र महिलामा लक्ष्मी राईले सहभागिता जनाउनेछन् । दुवैले स्लालम र जायन्ट स्लालममा आफ्नो चुनौती पेस गर्नेछन् ।
