विवादास्पद खेलमा स्पोर्टिङ इलाम एफसीलाई २–१ ले हराउँदै नेपाल सुपर लिग (एनएसएल)मा वीरगन्ज युनाइटेड एफसीले पहिलो जित निकालेको छ । दशरथ रंगशालामा वीरगन्जलाई महत्वपूर्ण जित दिलाउन घानाका खेलाडी विलियम ओपोकु असिइड र विसोन गुरुङले समान एक गोल गरे । खेलको १५औँ मिनेटमा आशिष चापागाईंले इलामलाई सुरुवाती अग्रता दिलाएका थिए । यद्यपि, खेलको अन्त्य निकै तनावपूर्ण रह्यो । इलामका खेलाडीले हार स्विकार्न नसक्दा माहोल बिग्रिएको हो ।
इलामका अधिकांश खेलाडीले रेफ्री कविन व्यञ्जनकारमाथि हातपातको प्रयास गरेका थिए । व्यञ्जनकारले खेल समाप्तिको ह्विसल फुक्दा इलामका मार्की तथा कप्तान विकेश कुथू सुरुमा विवाद निकाल्न अग्रसर भए । मैदानबाट बाहिरिने क्रममा कप्तान कुथूले रेफ्री व्यञ्जनकारलाई अपशब्द प्रयोग गरे । जसकारण उनले पहेँलो कार्ड पाए । पहेँलो कार्डपछि रेफ्रीलाई धक्का दिँदा उनलाई सीधै रातो कार्ड देखाइयो । त्यसपछि इलामका खेलाडी मैदानको मध्यभागमा प्रतिवादमा उत्रिए । रेफ्री व्यञ्जनकारलाई तत्कालै सुरक्षा प्रदान गरियो । मैदानभित्र सुरक्षाकर्मीको बाक्लो उपस्थिति रहँदा पनि थप पाँच मिनेट तनावग्रस्त नै भएको थियो । सुरक्षाकर्मीको घेराउमा टनेलबाट भित्र प्रवेश गर्ने क्रममा इलामका आक्रोशित समर्थकले प्रहार गरेको बोतल रेफ्री व्यञ्जनकारलाई लागेको थियो भने असिस्टेन रेफ्रीद्वय मधुकर आचार्य र सहदेव श्रेष्ठले छलेका थिए ।
दुई हजार समर्थकमाझ रेफ्री व्यञ्जनकारले दुई रातोसहित तीन पहेँलो कार्ड देखाएका थिए । रातो कार्ड बेहोर्र्नेमा इलामका गोलरक्षकसँगै प्रशिक्षकको भूमिकामा रहेका उज्ज्वल मानन्धर पनि रहे । इन्जुरी समयमा इलामका खेलाडीले बक्सभित्र हातले बल छोएपछि रेफ्री व्यञ्जनकारले वीरगन्जलाई पेनाल्टी दिएका थिए । यस निर्णयपछि मैदानभित्रका खेलाडी र मैदानबाहिरका अफिसियल आक्रोशित भए । विलियमले पेनाल्टीमा गोल गर्दै वीरगन्जलाई २–१ को अग्रता दिलाए ।
खेलपछि वीरगन्जका खेलाडी र अफिसियल खुसियाली मनाउन व्यस्त रहे । उनीहरूले टोलीको नाममा हुटिङ गरेका थिए । जितपछि वीरगन्जको प्ले अफ सम्भावना कायम रहेको छ । इलामको सम्भावना समाप्त भयो ।
रेफ्रीले खेलाडीलाई अपशब्द प्रयोग गरे
प्ले अफमा स्थान बनाउन असफल भएपछि पोस्ट म्याच कन्फ्रेन्समा फरक रूपमा उपस्थित इलामका प्रशिक्षक मेघराज केसीले रेफ्रीले खेलाडीलाई अपशब्द प्रयोग गरेको दाबी गरेका छन् । उनले जिम्मेवार व्यक्तिले नै अपशब्द प्रयोग गर्दा कारबाही हुनुपर्ने माग राखेका छन् । नेपाली फुटबलको स्तरअनुसार नै रेफ्रीहरू रहेको बताउँदै रेफ्रीलाई मात्रै दोष दिन नहुने बताएका छन् । केसी आफ्ना खेलाडी आक्रोशित हुँदा रेफ्रीलाई बचाउन मैदानमै पुगेका थिए ।
‘गाडी चढ्दा चालकझैँ खेलको वेला रेफ्रीको निर्णय मान्नैपर्छ । तर, पेनाल्टी किन दिएको थाहा भएन,’ इलामका प्रशिक्षक मेघराजले भने, ‘रेफ्री र खेलाडी दुवै आफ्नै देशका हुन् त्यसैले रेफ्रीलाई बचाउन पुगेँ । तर, रेफ्रीले अपशब्द बोल्नुहुँदैन थियो ।’ आफ्ना खेलाडीले गल्ती गरेको र उनीहरूले सजाय पाउने उनले जनाए । तर, मैदानमै अपशब्द प्रयोग गरेका रेफ्रीलाई पनि सम्बन्धित निकायले कारबाही गर्नुपर्ने उनको भनाइ छ ।
‘रेफ्रीलाई बचाउन पुग्दा खेलाडीले प्रहार गर्न पाएनन्, तर रेफ्रीले अपशब्द बोले । मैले मुख छाड्न हुँदैन भनेँ । प्रतिउत्तरमा ‘दाइ हामी कुटाइ खान आएको हो’ भनेर प्रश्न तेर्सियो । खेलाडीलाई कारबाही त होला, तर रेफ्रीलाई कसले कारबाही गर्ने ?’ केसीले प्रश्न गरे । वीरगन्जका प्रशिक्षक सनोज श्रेष्ठले जित्नैपर्ने दबाबका बीच खेल जितेपछि पेनाल्टीबारे थाहा नपाएको बताए । ‘हामीले जित्नैपर्ने खेल थियो । दबाबबीच ३ अंक आयो,’ श्रेष्ठले भने, ‘पेनाल्टीमा सबै अलमलिएका छौँ, पेनाल्टी दिएका वेला केही देखेनौँ ।’
विलियमको पेनाल्टी
खेलको अन्तिम सात मिनेटको इन्जुरी समयमा विलियमले पेनाल्टीमार्फत वीरगन्जलाई जित जित दिलाए । पाँचौँ खेलमा पहिलोपटक प्लेइङ सेटमा स्थान बनाएका आशिषले गोल गरे । सुरज बस्नेतले दायाँ भागबाट निकालेको बललाई नियन्त्रणमा लिँदै आशिषले गोल गरेका हुन् । आशिषले अघिल्ला पाँच खेलमा २८ मिनेट मात्रै खेलेका थिए । उनी वीरगन्जविरुद्ध ८९ मिनेट मैदानमा रहे । ३३औँ मिनेटमा भिसनले वीरगन्जलाई खेलमा फर्काए । सुशील लामाको क्रसमा बक्सभित्रबाट भिसनले गोलरक्षक कुथूलाई बिट गर्दै सहज गोल गरेका हुन् । बराबरतर्फ उन्मुख खेलमा वीरगन्जले पेनाल्टी पायो । पहिलो जितपछि पाँच खेलबाट ५ अंक जोडेको वीरगन्ज तालिकाको आठौँ स्थानमा उक्लिएको छ । ६ खेलबाट ४ अंक जोडेको इलाम तालिकाको पुछारमा झर्यो ।
राम्रो खेल्दा पनि प्ले अफ पुग्न सकेनौँ
मेघराज केसी, प्रशिक्षक, स्पोर्टिङ इलाम
प्ले अफमा पुग्ने सम्भावना समाप्त भएको छ । प्रतियोगितामा राम्रो प्रदर्शन गरेका छौँ । गत संस्करणमा पनि इलामले राम्रो खेलेको थियो । फुटबलमा प्रदर्शनले मात्रै पनि हुँदैन । नतिजा निकाल्न स्कोर हुनुपर्छ । हामीले प्रहार गरेको बल १० प्रतिशत मात्रै सदुपयोग हुन्थ्यो भने धेरै राम्रो हुने थियो । सधैँ राम्रो खेलेर मात्रै हुँदैन । वीरगन्जविरुद्ध पनि राम्रो खेलका हौँ, अवसर पनि बनायौँ । पहिलो हाफजस्तो दोस्रो हाफ हुन सकेन । खेल सकिएपछिको स्थिति राम्रो थिएन । ह्यान्डपछि पेनाल्टी दिएको भनिन्छ, तर त्यस्तो देखिँदैन ।
एकजुट भएर खेल्दा नतिजा आयो
सनोज श्रेष्ठ, प्रशिक्षक, वीरगन्ज युनाइटेड
इलामविरुद्धको खेल महत्वपूर्ण थियो । जित्नैपर्ने दबाब पनि थियो । एकजुट भएर खेल्दा तालमेल मिल्यो । खेलाडीले जित निकालेका छन् । अन्तिम समयमा विवाद भयो । पेनाल्टी दिएकोमा सबै कन्फ्युज छौँ । हामी बसेको स्थानबाट डिबक्सभित्र के भएको थाहा नै हुँदैन । रेफ्रीले खेल ब्यालेन्समै राखेका थिए । तर, पेनाल्टी नै विवादास्पद भयो । यो जितले प्ले अफ सम्भावना बढाएको छ । अरू टिमको अंक बढी छ । मुख्य खेलाडी घाइते हुँदा समस्या भयो ।
