अख्तियारका पूर्वप्रमुख बस्न्यात अनुसन्धान सुरु भएकै दिनदेखि भारतमा
ललितानिवास जग्गा हिनामिनामा प्रकरणको अनुसन्धान लम्बिँदा आरोपीहरू विदेश भाग्न थालेका छन् । बन्दी प्रत्यक्षीकरणको मुद्दा लम्बिँदा प्रहरी अनुसन्धानमा भन्दा अदालतमा बढी व्यस्त भइरहेको छ ।
पक्राउ परेका आरोपी तथा गत वर्ष नै पक्राउ नगर्न अन्तरिम आदेश लिएकाको मुद्दा सर्वाेच्च अदालतमा विचाराधीनमा छ । तीन सातादेखि प्रहरी बन्दी प्रत्यक्षीकरणसम्बन्धी मुद्दाका लागि अनुसन्धानको फाइल बोकेर सर्वाेच्च अदालत धाउँदै आएको छ । सर्वाेच्चमै दैनिक धाउनुपर्दा अनुसन्धानमा केन्द्रित हुन नपाएको प्रहरी अधिकारीहरू बताउँछन् । तीन दिनदेखि सो मुद्दामा लगातार सुनुवाइ भए पनि आदेश भएको छैन ।
तीन सय ५० भन्दा धेरै आरोपी भए पनि हालसम्म सिआइबीले १८ जनालाई मात्र पक्राउ गरेको छ । प्रहरी खोजीमा रहेका कतिपय विदेश पुगिसकेका छन् । अख्तियार दुरुपयोग अनुसन्धान आयोगका पूर्वप्रमुख आयुक्त दीप बस्न्यात प्रहरीले अनुसन्धान सुरु गरेलगत्तै विदेश पुगेको खुलेको छ । गत १२ असारमा उनी भारत गएको अध्यागमनको रेकर्ड छ । सोही दिन प्रहरीको केन्द्रीय अनुसन्धान ब्युरोले यसमा मुछिएका व्यक्तिलाई पक्राउ गरी अनुसन्धान थालेको थियो ।
बस्न्यात उपचारका लागि भनेर विदेश गएकोमा हालसम्म फर्किएका छैनन् । उनी भौतिक योजना तथा निर्माण मन्त्रालयको सचिव हुँदा ललितानिवास जग्गा भ्रष्टाचारमा जोडिएका थिए । त्यही वेला विशिष्ट व्यक्तिको निवास विस्तारसम्बन्धी परियोजना बनाएर करिब २५ रोपनी जग्गा हिनामिना भएको थियो । साढे तीन वर्षअघि नै अख्तियारले उनलाई प्रतिवादी बनाएर मुद्दा दायर गरेको थियो । जसमा विशेष अदालतले समेत उनलाई थुनामा पठाएकोमा पछि सर्वाेच्च अदालतको आदेशमा छुटेका थिए ।
बस्न्यातको निर्देशनमा टिप्पणी उठाउने तत्कालीन अधिकृत रहेका सञ्चारसचिव कृष्णबहादुर राउत भने सिआइबी हिरासतमै छन् । राउत त्यति वेला बस्न्यातको विश्वासपात्रका रूपमा मन्त्रालयमा कार्यरत रहेको स्रोत बताउँछ । सोही आधारमा उनले विशिष्ट व्यक्तिको निवास विस्तारसम्बन्धी टिप्पणी उठाएका थिए । त्यति वेला मन्त्रालयको सहसचिव रहेका नारायणगोपाल मलेगोमाथि पनि सिआइबीले अनुसन्धान गरिरहेको छ । ‘हाम्रो खोजीमा रहेका कतिपय व्यक्ति विदेश गइसकेको पाइएको छ,’ सिआइबीका एक अधिकृतले भने, ‘मुद्दा–मामिलाका कारण पनि थप अभियुक्त पक्राउमा समस्या भइरहेको छ ।’ अनुसन्धान प्रभावित हुँदा उच्चपदस्थमाथि प्रमाण जुटाउन कठिन हुन सक्ने प्रहरीको चिन्ता छ ।
पक्राउ परेकामध्ये धेरैको बयान प्रहरीले लिइसकेको छ । मालपोतका पूर्वअधिकृत धर्मप्रसाद गौतमले ललितानिवासको जग्गा सरकारी नै भएकाले व्यक्तिको नाममा जानु गलत भएको बयान दिएका छन् । तर, सो जग्गा व्यक्तिको नाममा लैजान आफ्नो भूमिका नभएको उनको दाबी छ । सिआइबीले नक्कली मोहीलाई समेत पक्राउ गरेको थियो । मोहीहरूले पनि सो जग्गाबारे आफूलाई जानकारी नभएको, शोभाकान्त ढकाल तथा रामकुमार सुवेदीले केही पैसा दिएर उजुरी दिन लगाएको बयान दिएका छन् ।
चारपटक गरेर बालुवाटारस्थित प्रधानमन्त्रीनिवाससँगैका एक सय ४३ रोपनी जग्गा हिनामिना भएको थियो । जसमा चारवटा छुट्टाछुट्टै मुद्दा दायरको तयारी भइरहेको छ । केही आरोपीले मुद्दाको हदम्यादको छिद्रमा खेलेर अनुसन्धानलाई डिसमिस गराउने प्रयास गरिरहेका छन् ।
