एकदिवसीय विश्वकप ग्लोबल छनोटअन्तर्गत बिहीबार सुपर सिक्समा जिम्बावेले ओमानलाई १४ रनले हराएको छ । सुपर सिक्सको पहिलो खेलमा जिम्बावेले पहिलो ब्याटिङ गर्दै ५० ओभरमा सात विकेट गुमाएर तीन सय ३२ रन जोडेको थियो । एसोसिएट राष्ट्र ओमानले ५० ओभरमा नौ विकेटको क्षतिमा तीन सय १८ रन जोड्यो । जितसँगै जिम्बावेले दुई अंक जोडेको छ । जिम्बावे बोनस चार अंकका साथ सुपर सिक्समा प्रवेश गरेको हो । ओमान समूह ‘बी’मा तेस्रो स्थानमा रहँदै सुपर सिक्समा छनोट भएको हो । सुपर सिक्समा छनोट हुँदा ओमानले अंक बटुलेन ।
अन्तिम ६ बलमा २९ रन आवश्यक
ओमानले जिम्बावेलाई इनिङ्सको अन्तिम ओभरसम्मै चुनौती दिएको थियो । अन्तिम ओभरमा ओमानलाई २९ रन आवश्यक थियो । ओमानका जिसन मक्सुदले छक्का प्रहार गर्दै जिम्बावेमाथि दबाब राख्यो । तर, टेन्र्ड चतराको कसिलो बलिङमा ओमानका ब्याट्सम्यानले थप बाउन्ड्री लगाउन सकेनन् ।
४९.६ ओभरमा मुक्सुद स्लिपमा क्याचआउट भए । उनले ४० बलमा तीन चौका र एक छक्का प्रहार गरी ३७ रनको योगदान दिए । मोहमद नदिमले १८ बलमा चार चौका र एक छक्का प्रहार गरी ओमानलाई जितको आशा दिलाएका थिए । चतराले ८ ओभरमा ७३ रन खर्चंदै तीन विकेट लिए । रिचार्ड गराभाले ६० रन दिँदै दुई विकेट हात पारे । ओमानले अन्तिम ओभरमा १४ रन बटुलेको थियो ।
ग्लोबल छनोटमा सिनको तेस्रो शतक
एकदिवसीय ग्लोबल छनोटमा जिम्बावेका ब्याट्सम्यान सिन विलियम्स उत्कृष्ट फर्ममा छन् । उनले छनोट खेलमा तीनपटक शतकीय इनिङ्स खेलेका छन् । ओमानसँगको सुपर सिक्समा उनले एक सय ४२ रनको शतकीय इनिङ्स खेले । यसक्रममा उनले एक सय तीन बलमा १४ चौका र तीन छक्का प्रहार गरे । छनोटअन्तर्गत सिनले नेपालसँगको प्रतिस्पर्धामा एक सय २ रन बनाए । यसैगरी, अमेरिकाविरुद्ध उनले एक सय ७४ रनको योगदान दिए ।
नेदरल्यान्ड्ससँगको भिडन्तमा सिनले ९१ रनको महत्वपूर्ण इनिङ्स खेले । ओमानसँगको खेलमा सिनले सिकन्दर राजासँग चौथो विकेटका लागि एक सय दुई रनको साझेदारी गर्दै जिम्बावेलाई ११२–३ बाट २१४–४ को बलियो अवस्थामा पुर्याए । सिकन्दरले ४९ बलमा ४२ रन जोड्दा ६ चौका प्रहार गरे । इनिङ्सको ४४.५ ओभरमा सिन आउट हुँदा जिम्बावे २७६/६ को अवस्थामा थियो । उनी बटको ओभरमा आउट भए ।
जिम्बावेको बलियो ब्याटिङ
प्रतियोगितामा जिम्बावे अपराजित रहेको छ । जिम्बावेले आफ्ना प्रत्येक विपक्षीविरुद्ध दरिलो ब्याटिङ प्रदर्शन गरेको छ । यसैक्रममा जिम्बावेले ओमानविरुद्ध पनि यस्तै प्रदर्शन गर्यो । ओपनरद्वय जोयलोर्डले ३४ बलमा २१ रन बनाए । क्रेज इर्भिनले ४० बलमा २५ रन बनाए । त्यसपछि वेस्लीले २६ बलमा २३ रन जोडे । जुक जोन्गवे नटआउट रहँदै २८ बलमा ४३ रनको योगदान दिए । उनले चार चौका प्रहार गरेका थिए । ११औँ क्रमका ब्याट्सम्यान रिचार्ड गाराभाले ११ रन जोडे । बलिङका क्रममा फायाज बटले ७० रन खर्चंदै चार विकेट लिए ।
कश्यपको शतक ओझेलमा
विशाल लक्ष्य पछ्याएको ओमानका लागि ओपनर कश्यप प्रजापतिले शतकीय इनिङ्स खेलेका थिए । यद्यपि, उनको शतकीय इनिङ्सका बाबजुद ओमानले जिम्बावेमाथि अप्रत्याशित नतिजा निकाल्न सकेन । कश्यपले ९७ बलमा एक सय तीन रन बनाए । उनले आफ्नो इनिङ्समा १२ चौका र एक छक्का प्रहार गरेका थिए ।
ओमानका लागि अकिब इलियासले ६१ बलमा ४५ रन बनाएका थिए । कश्यप र इलियासबीच दोस्रो विकेटका लागि ८३ रनको साझेदारी भएको थियो । कश्यप आउट हुँदा ओमान ३४.५ ओभरमा १९०÷३ को अवस्थामा थियो । मध्यक्रमका आर्यन खानले ४३ बलमा पाँच चौकाको सहयोगमा ४७ रन बनाए ।
