नेपाल भलिबल संघ (एनभिए)ले सातौँ प्रधानमन्त्री कप एनभिए महिला तथा पुरुष राष्ट्रिय भलिबल क्लब लिग २३ देखि ३० असारसम्म आयोजना गर्ने भएको छ । संघले सोमबार सातौँ संस्करणको खेल मिति र सहभागी टोली घोषणा गरेको हो । भलिबल संघले आयोजना गर्ने यो ठूलो प्रतियोगिता हो । यसबाहेक केही क्लब र संस्थाले प्रतियोगिता आयोजना गर्दै आएका छन् । संघले लिगमा एक क्लबले तीन विदेशी खेलाडी अनुबन्ध गर्न पाउने नियम राखेको छ । च्याम्पियन टोलीले आगामी डिसेम्बरमा नेपालमै आयोजना हुने काभा पुरुष क्लब च्याम्पियनसिपमा सहभागी हुन पाउने एनभिएका अध्यक्ष जितेन्द्र चन्दले जानकारी दिएका छन् ।
१४ क्लब सहभागी
गत ३ माघमा सम्पन्न क्लब च्याम्पियनसिपबाट छनोट भएका १४ क्लबबीच लिग हुनेछ । क्लब च्याम्पियनसिपबाट पुरुषतर्फ १५ र महिलातर्फ ८ टोलीले प्रतिस्पर्धा गरेका थिए । छनोट प्रक्रियाबाट लिगमा पुरुषतर्फ ८ र महिलामा ६ टोली छनोट भएको अध्यक्ष चन्दले बताए । पुरुषतर्फ साबिक विजेता हेल्प नेपाल स्पोर्टस् क्लब, उपविजेता त्रिभुवन आर्मी, एपिएफ, नेपाल पुलिस, दावाँली मिलन क्लब, केशवलाल स्मृति प्रतिष्ठान, गण्डकी प्रदेश भलिबल संघ, शैलुङ स्पोर्टस् रामेछाप रहेका छन् ।
राखेप कभर्डहलमा भएको अन्तिम खेलमा हेल्प नेपालले आर्मीलाई ३–० को सेटमा हराएको थियो । हेल्प नेपालले तीन पाकिस्तानी र तीन भारतीय सेनामा आबद्ध खेलाडी मैदान उतारेपछि राष्ट्रिय टोलीका खेलाडीले भरिएको आर्मी निराश बनेको थियो । महिलातर्फको च्याम्पियन नेपाल पुलिस उपविजेता न्यु डायमन्ड युथ स्पोर्टस्, नेपाल एपिएफ, त्रिभुवन आर्मी, एभरेस्ट भलिबल र गण्डकी प्रदेश भलिबल संघले भाग लिनेछन् । महिला फाइनलमा न्यु डायमन्डलाई ३–२ को रोमाञ्चक सेटमा हराउँदै पुलिसले एक दशकपछि उपाधि जित्न सफल भएको हो ।
विजेतालाई ६ लाख
संघले प्रतियोगिता आयोजना गर्न अनुमानित ७५ लाख लाग्ने जनाएको छ । राष्ट्रिय खेलकुद परिषद् (राखेप)बाट लिग सञ्चालनका लागि ४० लाख सहयोग भएको छ । दुवै विधाका विजेताले ६ लाख, उपविजेताले ३ लाख र तेस्रो हुने टोलीले एक लाख ५० हजार रुपैयाँ पाउनेछन् । चौथो स्थानले ७५ लाख पाउनेछ । सर्वाेत्कृष्ट खेलाडीले जनही ३५ हजार पाउनेछन् । विधागततर्फ उत्कृष्ट सर्भर, सेटर, ब्लकर, स्पाइकर, लिबेरो र प्रशिक्षकले जनही १५ हजार पाउने संघले जनाएको छ ।
