विवाह पार्टीमा झडप हुँदा चारजनाको मृत्यु

स्पेनमा आइतबार बिहान एक विवाह पार्टीमा झगडा हुँदा चारजनाको मृत्यु भएकाे छ। सोही झडपमा चारजना गम्भीर घाइते भएका छन्।

घटनामा संलग्न भएको आरोपमा तीनजनालाई हिरासतमा लिइएको राष्ट्रिय प्रहरीका प्रवक्ताले एएफपीलाई बताएका छन्। म्याड्रिडबाट करिब २५ किलोमिटर (१६ माइल) उत्तरपूर्वमा रहेको टोरेजोन डे अर्डोजमा विवाहको आयोजना गरिरहेको रेस्टुरेन्टको अगाडि बिहानै झगडा भएको थियो। झगडापछि एउटा कारले विवाहमा आएका पाहुनालाई ठक्कर दिएर भागेको थियो।

'जब हामी घटनास्थलमा पुग्यौँ र त्यहाँ गम्भीर चोटपटकबाट  चारजनाको मृत्यु भएको  पाइयो,' म्याड्रिड आपतकालीन सेवाका प्रमुख कार्लोस पोलोले बताएका छन्। 
घाइते अन्य चारजनालाई उपचारका लागि अस्पताल लगिएको उनले बताए।

आक्रमण गरेको आशंका गरिएको गाडी दुर्घटनास्थलबाट ५० किलोमिटर टाढा भेटिएको र त्यसमा सवार तीनजनालाई पक्राउ गरिएको प्रहरीले जनाएको छ। त्यसैगरी, प्रहरीले चौथो संदिग्धको खोजी भइरहेको बताएको छ।