- वि.सं २o८१ बैशाख २२ शनिबार
कतारले विश्वकप तयारीका क्रममा मारिएका र घाइते भएका आप्रवासी कामदारका लागि क्षतिपूर्ति कोषको मागलाई अस्वीकार गरेको छ। कतारका श्रममन्त्री अली बिन समिख अल मारीले एएफपीसँग कुरा गर्दै खाडी राष्ट्रका आलोचकमाथि ‘जातिवाद’ को आरोप लगाएका छन्।
मारीले कतारसँग कामदारको मृत्यु र घाइतेको उपचारका लागि कोष रहेको बताएका छन्। 'फिफाको नेतृत्वमा क्षतिपूर्ति अभियानको यो आह्वान पब्लिसिटी स्टन्ट हो,' उनले एक विशेष अन्तर्वार्तामा भने, 'हाम्रो ढोका खुला छ। हामीले धेरै मुद्दाको निरूपण र समाधान गरेका छौँ।'
एम्नेस्टी इन्टरनेसनल र ह्युमन राइट्स वाचले फिफा र कतारलाई ४४ करोड अमेरिकी डलरबराबरको कामदारका लागि कोष बनाउन माग गरेका छन्। मानवअधिकारवादी समूहहरूले कतारले मृत्युको रिपोर्टिङ कम गरेको आरोप लगाएका छन्।
कतार सरकारले निर्माणस्थलमा भएका दुर्घटना र गर्मीका कारण हुने रोगका कारण हजारौँको मृत्यु भएको भन्ने समाचारप्रति कडा आपत्ति जनाएको छ। फिफाले कोषको बारेमा ‘निरन्तर संवाद’ भइरहेको बताएको छ।
